TL Lakon Lider Nasionál, Lu Olo Hakotu Iis Ho Idade 72

Imajem : Francisco Guterres Lu Olo

SAPNewsTL, Malásia : Prezidente FRETILIN, Eis-Prezidente RDTL, Presidente Asembleia Konstituente no Eis-Prezidente Parlamentu Nasionál, Dr. Francisco Guterres Lú Olo, hakotu iis ona ohin, iha Ospitál Prince Court, iha Kuala Lumpur, Malázia, hafoin hala’o tratamentu saúde intensivu.

“Ho laran-triste kle’an no moras boot, família fó-hatene katak Sua Exelénsia Prezidente FRETILIN nian, eis-Prezidente RDTL nian, Presidente Asembleia Konstituente no eis-Prezidente Parlamentu Nasionál nian, Dr. Francisco Guterres Lú Olo, hakotu iis ona ohin, iha Ospitál Prince Court, iha Kuala Lumpur, Malázia, hafoin hala’o tratamentu saúde intensivu”. Sita Media Ofisial Eis PR Fracisco Guterres Lu Olo, iha Malasia, 21/06/2026.

Ninia partida ida ne’e reprezenta lakon boot ida ne’ebé labele troka ba kaben, oan no família tomak, ba FRETILIN, ba ninia kompañeiru luta sira, no ba sira hotu ne’ebé partilha hamutuk mehi no harii Timor-Leste ida ne’ebé livre, demokrátiku no soberanu.

“Ami husu ba hotu-hotu atu respeita família nia privasidade iha momentu susar ne’e, nu’udar ita hamutuk iha orasaun no fó omenajen ba ninia memória, ninia legadu, no ninia dedikasaun ba povu timor-oan”. Sublinha pajina Ofisial Lu Olo.

Informasaun kona-ba serimónia fúnebre nian sei fó-hatene iha tempu oportunu. Iha momentu lutu no laran susar ida ne’e, “ami hato’o ami-nia agradesimentu wa’in ba hotu-hotu ne’ebé hatudu ona solidariedade, amizade no apoiu ba família.
Obrigadu wain”. Sita Família Nobre Guterres

Saudozu ‎Francisco Guterres “Lu-Olo” moris iha postu administrativu Ossu, munisípiu Viqueque, iha loron 7 Setembru 1954. Saudozu nu’udar veteranu, aswain funu na’in ne’ebe luta ba libertasaun patria iha tempu okupasaun indonezia to’o Timor-Leste hetan ukun rasik an.
‎
‎Hafoin referendu no iha tempu independénsia, Saudozu sai Prezidente Assembleia Konstituinte iha 2001 no sai Prezidente Parlamentu Nasionál iha tinan 2002-2007.
‎
‎Iha tinan 2007, Lu-Olo nu’udar Presidente Partidu Frente Revolusionáriu Timor-Leste Independente (FRETILIN) konkorre iha eleisaun prezidensiál ba periodu 2007 to’o 2012, maibé la konsege konkista vitória iha momentu ne’eba.

Tuir mai Iha tinan 2017, Lu Olo kontinua firme hodi kompete no konsege eleitu sai Presidente Repúblika Demokrátika Timor-Leste husi 20 Maiu 2017 to’o 20 Maiu 2022.
‎
‎Durante nia mandatu, Lu-Olo hatudu nia lealdade, kompromisu no konsisténsia hodi defende no promove unidade nasionál, dialogu nasional, paz, estabilidade polítika, justisa no tau interese povu aas liu interese hothotu to’o mandatu remata.
‎
Hafoin independénsia, Lu Olo hetan konfiansa no mantein lidera Partidu FRETILIN desde 2001 to’o ohin loron 21 fulan Junhu 2026 nia hakotu iis iha Malasia.

‎Saudozu Francisco Guterres Lu Olo ba ho Maromak, hela ho Maromak no hamutuk ho Maromak hodi sai nafatin tau matan ba povu no rai Timor-Leste. adeus no adeus. obrigadu barak ba dedikasaun tomak.