IGE Koloka Ekipamentu Pejadu Normaliza Irrigasaun Manatutu no Laclo

SAPNewsTL Manatutu: Instituto de Gestão Equipamentos (IGE) hahú koloka ona ekipamentu pejadu atu normaliza hikas mota rua ne’ebé konsege sobu irrigasaun Manatutu Vila, Rembor no Laclo iha loron 4 Abril 2021.

Impaktu hosi udan boot iha altura ne’eba afeita ba irigasaun hetan estragus totál hodi afeita ba populasaun kuaze tinan rua ona labele halo natar. Nune’e, iha loron 7 de Jullu 2022 liuba, Asesor Polítika Presidente Repúblika, Tomás do Rosário Cabral lori karta rekomendasaun husi Prezidente Repúblika, José Ramos -Horta atrávez husi Xefe Casa Civil hodi hala’o reniaun ho autoridade no agrikultor Manatutu presiza hetan intervensaun lalais.

Prezidente Republika, José Ramos-Horta antes ne’e hala’o ona dialogu ho populasaun sira hodi husu rezolve problema irrigasaun, nune’e iha loron 15 juñu 2022, Xefe Estadu hala’o mos  enkontru ho Prezidente Institutu Jestaun Ekipamentu, Institutu Públiku (IGE), Ermenegilda da Costa Laurentina hodi informa preokupasaun povu hodi IGE bele hadia mos kondisaun estrada ligasaun Cribas ba aldeia Camedar, Suku Barique, Postu Administrativu Natarbora- Manatutu.

Asesor Politiku Prezidente Repúblika, Tomás do Rosario Cabral iha vizita ba Mota Rembor koordena kedas ho ekipa IGE bele tulun hodi koloka ekipamentu pejadu hadia hikas kondisaun irrigasaun hodi fasilita bee tama populasaun sira nia natan laran.

“Impaktu hosi udan boot iha loron 4 Abril 2021, irigasaun kuaze aat hotu, tinan rua kuaze populasaun la halai natar, tanba ne’e prezidente republika husu tulun ba IGE ho koordenasaun autoridade no povu Manatutu hodi tulun no  hadia hikas kondisaun mota hodi bee bele tama fali ba populasaun nia natar,” informa Asesor Politiku Tomás Cabral, Manatutu, 21/11/2022

Entretantu dadaun ne’e ekipa IGE koloka ona ekipamentu pejadu boot rua ba Mota Rembor no tuir planu, tersa (22-11-22) ba oin ekipa hahú servisu hadia bee dalan ne’ebé hetan estragus grave bele normaliza hikas.

Parte seluk, Administrador Munisípiu Manatuto, Bernardo Lopes hato’o agradese ba apoiu hosi Prezidente Repúblika, José Ramos Horta hodi koordena ho IGE bele tulun oinsá koopera servisu diak liutan ba iha nesidade povu nian iha tempu emerjensia.

Jornalista  : Vinsensio Saldanha