Konstrusaun Rezidiensia Irmã Franciscana Laleia Sei Finaliza Iha Tempu Badak

SAPNewsTL (LALEIA) : Prosesu kontrusaun ba rezidiensia Irmã Franciscana Missionária Nossa Senhora Laleia sei finaliza iha tempu besik, Edifisiu modernu kompostu hosi kolegiu, sentru Formasaun, kampu kampo futsal, jardin halimar ba labarik, no residénsia komunidade religiosa provincia Portuguesa konstrui hosi Arquiteto Cesar Almeida husi Empresa CC Construcões Portugál ho totál orsamentu kuaze miliaun $1.

Tuir planu iha fulan Janeiru 2023, ekipa kompaña sei finalize servisu no prosesu inagurasaun bele akontese iha fulan marsu ou abril nia laran.

Asesor Politiku Prezidente Repúblika, Tomás do Rosario Cabral ne’ebé hala’o vizita obserbasaun ba projetu ne’e sente orgullu, tanba prosesu kontrusaun halo ho kualidade tuir dezeñu ne’ebè Irmã Franciscana Missionária Nossa Senhora aprezenta nu’udar na’in ba projetu.

Edifisiu ne’e harii iha Laleia bazei ba kooperasaun no koordenasaun servisu entre Irmã Franciscana Missionária Nossa Senhora ho mandatu Governu Konstitusional dalima nian.

Iha obserbasaun ne’e, Asesor Tomás akompaña hosi Arquiteto Cesar Almeida vizita no haree direita prosesu instalasaun liña eletrisidade ne’ebé parte tekniku EDTL Manatutu instala ona trifaze ba konstrusaun kolegio laran tomak.

Kompaña refere mos harii ona baregem bee boot iha iha rai kuak ho kuantidade boot hodi halibur udan been labele sai hodi bele utiliza iha tempu bailoron bele rega aifunan no ai-horis sira ne’ebé sei kuda heleu rezidensia ne’e iha foho leten Laleia bele sai matan nafatin.

Madre Kongregasaun Franciscana, Alvina sente haksolok tebes ho vizita husi Gabinete Presidente Repúblika reprezenta hosi Asessor Polítika Presidente Repúblika hodi ajuda sira halais servisu hotu- hotu bele finalize prosesu kontrusaun.

Madre Alvina agradese, tanba ho apoiu Prezidente Repúblika, José Ramos-Horta no Maun Boot Kay Rala Xanana Gusmã nia tulun sira nia servisu bele hetan asisténsia rapidu husi parte kompetente sira ba asuntu ida ne’e, ho nune’e prosesu konstrusaun bele la’o ho di’ak no lalais atu bele utiliza tuir tempu ne’ebé termina ona.

“Ami agradese tebes ho apoiu Prezidente Repúblika, Maun Boot Xanana, autoridade no povu Manatutu-Laleia nia tulun,” madre agradese.

Antes remata vizita ida ne’e, Asesor Polítika Presidente Repúblika, Tomás mos informa ba Kongregasaun Irmã Franciscana Nossa Senhora Laleia no Arquiteto husi empresa sira katak, PR Ramos-Horta no Maun Boot Kay Rala Xanana Gusmão rasik preokupa ho difikuldade ne’ebé komunidade Franciscana Laleia enfrenta.

Tuir planu iha tempu besik, PR Ramos-Horta sei hala’o vizita hodi haree besik progresu husi konstrusaun ne’e rasik. Tamba bainhira konstrusaun ne’e remata komunidade Manatuto ho Baucau sei benefisia direta ba programa dezenvolve edukasaun no atividade Igreja nian ne’ebé sei estabelese husi Kongregasaun Irmã Franciscana Laleia.

Jornalista : Vinsensiu Saldanha