Ikan Baleia Mate Iha Likisa ! Xefe Governu Ho Ekipa Bombeirus Ba Hakoi
Imajem : Primeiru Ministru Kayrala Xanana Gusmão haree ikan buleia ne’ebé mate iha Ulmera-Likisa, 15/03/2025. Foto : Media-GPM
SAPNewsTL, Liquiça : Relasiona ikan baleia ida ne’ebé mate iha loron 13 fulan Marsu, Primeiru-Ministru (PM), Kay Rala Xanana Gusmão to’o iha Ulmera no orienta ekipa Bombeirus Timor-Leste hakoi ikan baleia boot refere.
Tuir informasaun ne’ebe SAPNews asesu liu hosi Pajina Ofisial Facebook Xanana ba Ema Hotu informa katak Ikan Baleia ne’ebé mate ne’e iha área tasi ibun aldeia Nauner, suku Ulmera, postu administrativu Bazartate, munisípiu Liquiça, sábadu (15/03/2025) oras kalan ne’e Primeiru Ministru orienta ona ekipa bombeirus hodi hakoi.
“Primeiru-Ministru orienta ekipa bombeirus no mós husu apoiu hosi empreza Xineza hodi oferese mákina éksa atu bele halo rahun no kee rai hodi hakoi ikan ho medida boot ne’e”. Sita pajina Xanana Ba Ema Hotu iha loron, 15/03/2025. SAPNews Screenshot
Komunidade ne’ebé hela besik iha área ne’e katak, ikan baleia ne’e mate iha tasi ibun desde kinta (13/03/2025) meiudia no oras-ne’e komesa dodok no iis ona hodi prezudika saúde públika.
“Komunidade kontente tanba Xefe Governu orienta ona ekipa hodi hakoi lalais atu labele husik dodok no lori moras bá ema boot ho labarik sira”. Sita Pajina Xanana Ba Ema Hotu
Maski kalan boot ona, maibé Prezidente Autoridade Munisípiu Liquiça, Paulino Ribeiro, Autoridade lokál sira hamutuk ho komunidade iha área ne’e akompaña Xefe Governu ho ekipa to’o hakoi ikan ne’e.
Jornalista : Marciana da Conceição
