Jornalista Laos Krime, TLPU Husu MAPKOMS Retira Keixa No Buka Solusaun

Dili-Timor-Leste Press Union (TLPU) nu’udar mahon ba Jornalista sira ne’ebe promove no defende direito jornalista sira nian bainhira hala’o kna’ar profisionál iha orgaun komunikasaun sosial, Relasiona ho Keixa MAPKOMS hasoru Jornalista Média Hatutan.Com, TLPU husu MAPKOMS retira keixa no buka solusaun tuir dalan demokrasia

Tuir Prezidenti TLPU Candido Alves hateten katak-Tuir artigo 40 ho 41 fo direitu no dever tomak ba Jornalista sira atu hala’o Jornalista sira nia Servisu tuir liberdade imprensa nian.

“Iha Loron-03 fulan Maio liu ba ha’u simu informasaun pozitivu tebes husi Organizasaun Internasional katak Timor-Leste tama iha espasu sanulu resin Hitu(17) tanba ita iha liberdade imprensa boot tebes,maibe foin dadauk iha Loron tolu (3)liu ba simu fali informasaun katak ita nia belun ba hatan ona iha Ministeriu Publiku,ida ne’e hau nu’udar Prezidente TLPU senti triste tebes”. Dehan Prezidente TLPU Candidu Alves ba Jornalista iha Fatin Sede Veteranos Taibessi, Quinta-Feira-26-05-2022.

Iha fatin hanesan, Sekretariu Jeral TLPU hateten, TLPU la’os organizasaun politika ida, maibe hambrik ho prinsipiu defende Direitu Jornalista tuir Lei Inan artigu 41 no 42 Timor-Leste nian.

“TLPU La’os Organizasaun politika ida ka la’os Organizasaun komersiu, maibe Organizasaun ne’ebe ho prinsipio defende direito Jornalista no halo advokasia ba liberdade imprensa hodi hametin demokrasia,ne’ebe garantia ona iha konstituisaun RDTL,Artigu 40 ho 41,ne’ebe koalia kona ba promove Direitu sira ba asesu informasaun nian no direitu ba Jornalista sira atu halo Kobertura ne’ebe mak defende ba lia-loos”. Hatutan Secrmetario Jeral TLPU Zezito da Silva

Zezito akresenta TLPU hanesan Organizasaun ne’ebe halo advokasia makas ba liberdade imprensa senti triste ho asaun Ministru Asuntu Parlamentar no Komunikasaun Sosial (MAPKOMS), Fransisco Martins da Costa Pereira Jeronimo ne’ebe halo keixa hasoru Jornalista.

TLPU senti triste ba keixa ne’e tanba mosu iha momentu ne’ebe Timor-Leste nia indise liberdade imprensa ne’e hetan diak husi 71 ba 17,ne’ebe lolos Timor-Leste senti orgullu,maibe iha momentu hanesan Ministeriu kompetente ne’e uza kodigu penal hodi kriminaliza servisu jornalizmu nian.Tenik Nia

Entretantu, Timor-Leste Press Union (TLPU) rekomenda ba MAPCOMS Sr. Francisco Martins da Costa Jeronimo atu ho fuan boot dada hikas fali nia keixa ne’ebe hato’o ba Ministeriu Publiku hodi fo garantia ba liberdade imprensa, uza Direitu resposta ho baze ba Lei komunikasaun sosial Artigu 2 iha alina F katak “Direitu hodi halo loos”direitu ba ema singular ka koletivu ida-idak hodi halo loos notisia ne’ebe publika ka fo sai faktu be la loos kona ba Nia, hato’o informasaun ne’e ba konsellu imprensa Timor-Leste atu halo mediasaun hodi hetan Solusaun ne’ebe justu tuir dalan Demokrasia nian.

Enkuantu, TLPU mos husu ba Publiku tomak katak Jornalista ne’e Laos krime,tanba ne’e bainhira sidadaun senti katak servisu jornalizmu iha buat ruma la loos,Lei komunikasaun sosial nian iha atu resolve no halo mediasaun la’os lori kodigo penal akuza Jornalista tanba deit ninia obra jornalistika.

Reportazen: Conzita Mota

Editor : Absa da Costa