Kadi Kakutak, UNTL Realiza Debate Sientífiku Ba Estudante Fakuldade Sia

SAPNewsTL, Dili : Estudante Universidade Nasional Timor Lorosa’e (UNTL) liu husi Gabinete Vice-Reitora ba estudantis realiza atividade extra kurikular hanesan debate sientífiku ba estudante Fakuldade sira

Objetivu husi debate sientífiku ho tema movimentu akadémiku no kultura akadémiku ne’e hodi dezenvolve no hasa’e kapasidade estudante sira nian liliu oinsa hatene halo peskija, hakerek artigu Sientífiku no halo debate ho argumentu ne’ebe krítiku no konstrutivu

Tuir Juri ba debate sientífiku, José Lopes hateten debate sientífiku ne’e kadi kunhesimentu no abilidade estudante sira nian

“Ohin ita koko hodi kadi kakutak, haree sira nia kunhesimentu no abilidade sira, ezemplu sira nia abilidade kona ba materia sira ne’e lixu nian, vantagem no desvantagem sira, oinsa mak atu bele hamosu konsiensia moral ba ita nia sidadaun atu iha konsiensia katak lixu ne’e bele estraga ita liliu ba ita nia saúde”. Hateten Juri debate, José Lopes iha Kampus UNTL, INFORDEPE Balide, tersa-feira05/09/2023.

Iha parte seluk, mestradu direitu humanu ne’e haktuir, debate sira ne’e importante tebes ba hasa’e konsiensia humana hodi kontribui ba damen no estabilidade liliu oinsa hadia dezenvolvimentu nasaun nian

“Ita atu hetan paz no estabilidade Liu husi sira nia hanoin ne’ebe di’ak kontribui ne’e hanesan mos referensia ida atu hadia mos nasaun Timor-Leste”. Nia subliña

Debate sientífiku ne’e lalos haree de’it talentu estudante sira nian maibe oinsa sira bele apresenta matéria, defende lialos no influênsia sosiedade moris ho lialos

Antes ne’e, UNTL nia Vise Reitora Asuntu Estudantil organiza ona atividade sira hanesan Expozisaun Mulleres, Jogu Voleibol no Futsal, kompetisaun diskursu públiku, expozisaun sientífiku, semináriu no seluk-seluk

Iha debate sientífiku ne’e partisipa husi estudante sira hanesan representante Fakuldade Medisina Ciénsia Saúde (FMCS), Fakuldade Siénsia Exatas (FCE), Fakuldade Siénsia Sosiais (FCE), Fakuldade Edukasaun Artes e Humanidades (FEAH), Fakuldade Engenharia Ciensia no Teknolojia (FECT), Fakuldade Ekonomia no Gestaun (FEG), Fakuldade Direitu (FD) no Fakuldade Filosofia (FF), entretantu Fakuldade Agrikultura mak kansela sira nia partisipasaun iha debate ne’e tanba iha fallansu tekniku

Reprezentante kada Fakuldade kompostu husi estudante na’in 7, matéria sira ne’ebe estudante sira apresenta iha kompetisaun debate ne’e mak hanesan Jestaun Lixu Iha Kapitál Dili, Impaktu Média Sósial Ba Estudante Sira, Taís Nu’udar Patrimôniu Kultural Imaterial, diminuisaun liafuan naun apropriadu iha sosiedade, no seluk tan

Rezultadu husi kompetisaun debate refere Fakuldade neen kontinua ba faze final no Fakuldade rua hanesan Fakuldade Engenharia Ciensia no Teknolojia, Fakuldade Medisina Ciénsia Saúde no Agrikultura hetan eliminasaun iha faze dahuluk. Faze final sei realiza iha loron 12 Fulan Setembru semana oin

Reportajem : Aquelina Magalhães