Karketu Konkista Vitoria Dahuluk Kontra Ponta Leste Ho Skore 2-1

SAPNewsTL, Dili: Karketu Dili FC konskita vitoria dahuluk kontra AS Ponta-Leste iha jornada datoluk divizaun dahuluk Liga Timorense epoka 2023.
Jogu entre Karketu Dili FC kontra AS Ponta Leste hala’o iha Estadium Munisipal Dili sabadu (11/03/2023)
Jogu parte dahuluk bainhira kick off ekipa rua ne’ebe ho ambisaun hakarak manan jogu halo inisiativa halo presaun ba malu liu husi kontra atake ne’ebe tama ba minutu 24 jogador Expedito da Conceicão marka golu hodi halo redi adversariu nakdoko hatuur kedas skore ba 1-0.
Skore refere halo Karketu Dili FC halo presaun makaas ba AS Ponta Leste ne’ebe tama minutu 34 jogador estranjeiru Mauricio Conzales husi Karketu Dili FC marka golu ba baliza adversariu ne’e la asegura nia redi ho diak hodi muda skore 1-1.
Rezultadu impata halo ekipa rua hasa’e ritmu jogu hodi hetan oportunidade ameansa baliza kada ekipa nian dala
barak ne’ebe tama ba minutu 44 jogador AS Ponta-Leste sofre golu ida tan husi jogador Augusto da Costa husi Karketu Dili FC hodi muda fali skore 2-1 ne’ebe rezultadu refere lori Karketu Dili FC lidera minutu 45 jogu parte dahuluk nian.
Kontinua ba jogu parte daruak nian ekipa rua muda estratejia jogu tuir ida-idak nia estratejia hodi halo presaun nafatin ba malu ne’ebe jogador husi ekipa rua hetan oportunidade ameansa baliza kada ekipa nian dala barak maibe la konsege to’o minutu 90 remata skore nafatin 2-1 lori Karketu Dili FC konkista vitoria dahuluk iha jornada datoluk Liga Timorense epoka 2023 hodi hetan pontu tolu.

Depois jogu remata asistente treinador AS Ponta-Leste Lourenço da Costa dehan, sira fo parabens ba adversariu no sira simu rezultadu derrota tanba faila husi treinador no jogador sira
“Ami fo parabens ba Karketu Dili FC no husu deskulpa ba adeptu sira husi AS Ponta Leste ne’ebe suporta ami ne’ebe ohin ami derrota tanba failansu tekniku husi treinador no jogador sira tanba buat ne’ebe durante ne’e ami fo treinamentu sira la halo iha jogu ne’ebe ami simu derrota ida ne’e”, tenik Lorenço
Lorenço hatutan, jogu tuir mai sira hadia para hetan vitoria tanba sira lakoi degrada ba divizaun daruak Liga Timorense tanba sira nu’udar ekipa zigante ida
Iha sorin seluk sekretariu jeral Karketu Dili FC Elizeu Isaac Veloso hatete, vitoria ne’e nia agaradese ba ekipa no sira sei hadia faila ba jogu tuir mai.
“Hau parabens ba ekipa nafatin hatudu sira nia mentalidade kampiaun nian ne’ebe rezultadu vitoria ne’e ami orgullu ba ida ne’e tanba hetan pontu tolu ne’ebe ami halo nafatin evaluasaun ba faila sira iha jogu tanba sei iha jogu lima tuir mai”, Elizeu hateten
Entretantu iha jogu refere Karketu Dili FC halo substituisaun ba jogador nain lima no AS Ponta-Leste troka jogador nain haat, jogador nain rua husi Karketu Dili FC hetan kartaun kinur rua no jogador nain rua mos hetan mos kartaun kinur.
Reportajen: Augusto dos Santos