Edit Savio Marka Golu Rua Lori Emmanuel Manan Coração 2-1
SAPNewsTL, Dili: Jogador Edit Savio marka golu rua lori Emmanuel FC manan Atletico Ultramar/Coração FC ho skore 2-1 iha divizaun dahuluk Liga Timorense epoka 2023.
Jogu Emmanuel FC kontra Atletico Ultramar/Coração FC hala’o iha Estadium Munisipal Dili domingu (12/03/2023).
Iha jogu parte dahuluk bainhira kick off Emmanuel FC konsege marka golu lais husi jogador Edit Savio iha segundu 52 hodi hatuur kedas skore 1-0, rezultadu ida ne’e halo ekipa rua nia lao manas tanba sira ho ambisaun hakarak aumenta tan golu para manan jogu ne’ebe ekipa rua lansa presaun ba malu liu husi kontra atake ne’ebe tama minutu 14 Atletico Ultramar/Coração FC responde golu adversariu husi jogador Rofino Gama iha minutu 14 muda fali skore 1-1.
Skore refere halo jogador Emmanuel FC halo presaun fila fali ba adversariu ne’ebe tama minutu 40 Edit Savio husi Emmanuel marka tan golu hodi muda fila fali skore ba 2-1 no skore refere lori Emmanuel FC lidera jogu parte dahuluk minutu 45 nian.
Tama ba jogu parte daruak ekipa rua muda estratejia hodi halo substituisaun jogador, sira halo presaun ba malu ne’ebe jogador sira husi ekipa rua hetan oportunidade ameansa baliza kada ekipa maibe la konsege marka golu hodi aumenta golu para manan jogu to’o jogu parte daruak minutu 90 remata store nafatin 2-1 hodi rezulta Emmanuel FC konkista vitoria no hetan pontu tolu kontra Atletico Ultramar/Coração FC.
Depois jogu remata asistente treinador Emmanuel FC Van Basten dehan, sira konkista vitoria tanba sira halo motivasaun no muda estratejia jogador sira nian durante halo preparasaun semana ida.
“Ohin ami konkista vitoria kontra Atletico Ultramar/Coração FC tanba depois derrota kontra AD SLB Laulara ami halo preparasaun durante semana ida hodi fo motivasaun ba jogador sira no muda estratejia jogu nian”, tenik Basten
Basten hatutan, jogu tuir mai sira sei hadia parte lina klaran no atakante nian para hetan bola hatama kedas tanba sira hasoru ekipa zigante AS Ponta-Leste ho jogador prinsipal nain rua sei la joga tanba akumulasaun kartu maibe sira sei hatudu jogu diak tanba sira mai jogador foinsa’e Timor-Leste hakarak hatudu ba publiku katak sira jogador joga husi ain ba ain.
Iha sorin seluk treinador Atletico Ultramar/Coração FC Januario de Almeida dehan, ohin ekipa rua hatudu joga diak maibe sorte monu ba Emmanuel FC no sira lakon tanba faila iha baliza.
“Ohin ekipa rua hatudu joga diak maibe sorte monu ba Emmanuel FC manan jogu, hau fo parabens ba ekipa adversariu no ami lakon tanba faila iha baliza tanba ida preparadu atu tun la joga”, Januario hateten
Januario akresenta tan, ohin golu lais husi Emmanuel FC halo jogador sira nia mentalidade monu entaun ekipa adversariu aproveita ida ne’e hodi domina bola no jogu tuir mai hadia sala sira ohin ne’e para labele akontese tan.
Entretantu jogu refere Atletico Ultramar/ Coração FC halo substituisaun ba jogador nain tolu no Emmanuel FC mos troka jogador nain tolu iha jogu minutu 90 nia laran, jogador husi Emmanuel FC nain tolu mak hetan kartaun kinur no Atletico Ultramar/Coração nain rua hetan kartaun kinur.
Reportajen: Augusto dos Santos