Klube 45 Partisipa Taxa AFAMA no Femenina F-FDTL 2022, Guido : Promove Talentu Ho Dixiplina

SAPNewsTL, Dili: Asosisaun Ami Família Militar Aswa’in (AFAMA) no Femenina Falintil Forsa Defeza Timor Leste (F-FDTL) halo abertura jogu futsal, iha Taxa erefe partisipa husi klube mane 32 no feto 13

Tuir Reprezentante Prezidente AFAMA Amélia M. de Rosário agradese ba klube sira ne’ebé simu sira  nia konvite hodi partisipa iha kompetisaun ida ne’e, nune’e liu husi eventu ne’e bele hametin lasu amizade entre juventude sira.

“Ami agradese ba klube mane 32 no feto 13 ne’ebé simu ami nia konvite ne’ebé bele mai partisipa kompetisaun, ohin loron ita halo abertura ba Taxa AFAMA no Femenina F-FDTL 2022 ho objektivu atu hametin amizade entre juventude no promove juventude sira iha modalidade futsal iha Timor Leste”. Dehan Reprezentante Prezidente AFAMA Amélia M. de Rosário  iha nia diskursu iha kampu Kuartel Jeral F-FDTL ,Fatuhada-Díli, Tersa-Feira, 04/10/2022.

Entretantu, Amelia mos agredese ba Instituisaun F-FDTL, Femenina F-FDTL, Media Juventude Hadomi Desportu (JHD) no doador sira hanesan, Fortune Star, Timor Safari, Maudoko FC, Timor-Telecom, Nano Sport, DCP-TL, MTG Holding ho Dragon Lotaria  ne’ebé fo ona apoiu ba sira hodi realiza Tasa AFAMA no Femenina F-FDTL 2022.

Nia hatutan, total orsamentu premiu ba ekipa mane 32 sira prepara 5,400 USD no feto 13  sira prepara 3,200 USD, nia fiar katak klube sira sei hatudu jogu di’ak hodi anima adeptu sira no sai manan nain.

“Ami prepara osan premiu ba manan nain sira husi 1 – 4  ba ekipa mane sira, ami prepara 5,400 USD no feto sira ami prepara 3,200 USD ne’ebe ami hein katak klube sira sei hatudu jogu diak hodi anima adeptu sira hodi bele sai manan nain”. Tenik nia

Nia informa,  klube mane 32 ne’ebé sei kompete iha kompetisaun ne’e mak Saralima FC, AS Jerman,, AD. E. Baguia, A. Nomad FC, Mauputar FC, Ramelau FC, B’TAL FC, Becusse  United, São F. Xavier, Mushila FC, Coelho FC, Gamer FC, Boa Sorte,  FC Caesar Dante, BAS, M-VDL, Crazy Horse, Andeco FC, Repal FC, BDL,  Maudoko-A BTR-One,  Brotherhood,   Lorico FC,  Maudoko-B, SDB Benfica,  Nakdah FC, ETDA,  Lafeak FC, Bongkar,  Ademeki FC  no Q.General enkuantu  klube Feto 13 maka  Buset FC, Mushila FC, Lahane Redbull FC, Lorosa’e, Maudoko FC, F-FDTL-A, FC Santa Rosa,  F-FDTL-B, Tequila,  Treze, Malkamer FC, Amigas FC, AD Estrela Baguia no  Timor-Telecom.

Iha fatin hanesan reprezentante Xefe Estadu Maior Jeneral F-FDTL Guido Monteiro hatete, kompetisaun ne’e importante ba juventude sira atu espresa talentu no kria amizade entre klube sira

“Kompetisaun ida ne’e importante ba joven sira, objektivu atu halo lasu amizade entre joven sira iha klube sira  no fo fatin ba jogador sira espresa talentu husi modalidade iha Timor Leste hodi bele ba kompete kompetisaun internasional, ha’u husu ba jogador sira kria amizade no kooperasaun iha jogu laran  labele hamosu no ha’u husu mos ba treinador sira para lidera klube atu nune’e labele mosu dezentendimentu durante jogu la’o”. Tenik Guido

Nune’e mos, Nia (Guido) lori Komandu nia naran hato’o bemvindu ba klube mane 32 no feto 13 ne’ebé bele rejistu hodi kompete iha Taxa AFAMA no Femenina F-FDTL 2022, komandu F-FDTL husu klube sira tenki hatudu dixiplina no maturidade iha eventu ne’e hodi bele sai manan nain halo istoria iha kompetisaun ne’e tanba susesu iha klube ida-idak nia liman.

Jornalista  : Augusto dos Santos

Editor        : Ekipa Editorial