Imajen: Diretor nasional Juventude no desportu SEJD David de Deus hamutuk ho diretor tekniku FFTL Gaspar Quitão ho treinador nain- 21 iha Otel Novo Turismo Lecidere, Dili segunda (6/02/2023).
SAPNewsTL, Dili: Korea International Cooperation Agency (KOICA) fo formasaun ba treinador foun nain-21 durante loron neen atu nune’e ba futuru sira sai treinador ba Labarik sira iha Timor-Leste.
“Ohin ita fo treinamentu ba treinador foun hamutuk nain-21 ne’ebe objetivu husi treinamentu ne’e atu hanorin sira sai treinador diak ba labarik sira hanesan oinsa salva guarda labarik sira, nutrisaun ba jogador labarik sira no komunikasaun ba ekipa”, dehan Field Manajer KOICA Minyoung Lee ba jornalista SAPNewsTL iha otel Novo Turismo Lecidere, Dili segunda (6/03/2023)
Manajer hatutan, Koica nia programa iha Timor-Leste ne’e la’os treinamentu ba treinador sira deit maibe iha programa barak los, treinamentu ba treinador sira halo dala tolu komesa husi 2022 tanba tinan ida halo dala rua depois sira remata sira treinamentu ne’e sira bele sai treinador ba Labarik sira Timor-Leste liu husi programa KOICA nian no mos ba klube sira seluk.
Iha Sorin Seluk diretor nasional juventude no desportu SEJD David de Deus dehan, lori SEJD nia naran hakarak apresia ba treinamentu ida husi KOICA hamutuk ho FFTL ne’ebe dezenvolve treinador sira ba labarik iha Timor-Leste.
“Ha’u lori SEJD nia naran hakarak apresia ba treinamentu ida ne’e husi KOICA hamutuk ho FFTL ne’ebe dezenvolve treinador sira ba labarik sira iha Timor-Leste tanba fo treinu ba labarik sira tenki hatene direitu labarik sira nian atu nune’e bele hanorin labarik iha kampu ho diak”, tenik David
Iha sorin seluk diretor tekniku FFTL Gaspar Quitão hatete, treinador ne’e importante tanba la’os sai treinador deit maibe sai mos edukador ba jogador sira atu nune’e sira bele iha kunesimentu klean ba buat sira seluk.
“Ohin, ha’u Partisipa abertura treinamentu ida ne’e tanba treinamentu ne’e importante ba klube ida iha futebol maski fo treinu ba jogador labarik sira la fasil tanba treinador laos sai treinador deit iha kampu maibe sai edukador ba labarik sira atu nune’e sira labele sai jogador deit maibe iha kuñesesimentu klean ba buat sira seluk”, tenik Gaspar
Reportajen: Augusto dos Santos