SEJD Despede Jogador Arino & Noberto Aranka Ba Brazil
Imajen: SEJD Abrão Saldanha ho Jogador Norberto Olivio da Costa no Ario Ximenes iha edifísiu SEJD Lecidere, Dili segunda 6/02/2023
SAPNewsTL, Dili: Sekretariu Estadu Juvetude no Desportu (SEJD) halo despedida ho Jogador Norberto no Arino husi Sentru Treinamentu Juvenil Munisipiu Baucau (CTFJ-MB sigla portuges) aranka ba Brazil hodi tuir treinamentu durante tinan ida.
“Ohin ita despede jogador Norberto Olivio da Costa ho Ario Ximenes ba tuir treinamentu iha klube Evor de sport iha São Paulo, Brazil ne’ebe durante ne’e observa hela ita nia jogador nain rua ne’e iha Timor-Leste, klube ne’e hakarak lori ita nia jogador ba treinu iha Brazil hanesan formasaun”, dehan SEJD Abrão Saldanha ba jornalista sira iha nia knaar fatin Lecidere, Dili segunda (6/03/2023)
Abrão hatutan, klube Brazil ne’e hakarak jogador nain rua entaun governu esforsu liu husi SEJD embaixador Timor-Leste iha Brazil, embaixada Brazil iha Timor-Leste, SEJD ho autoridade futebol iha Brazil ohin konsege jogador nain rua aranka ba Brazil, esperansa governu iha hakarak sira performa diak tanba sira sai hanesan embaixador Timor-Leste ba Brazil hodi loke dalan ba foinsa’e sira iha Timor-Leste ne’ebe gosta futebol hodi bele hetan oportunidade hanesan sira ba treinu iha rai seluk hodi mai dezenvolve futebol iha Timor-Leste.
Governante ne’e informa, sira ba programa treinu durante tinan ida depois haree oinsa bele halo kontinuasaun, orsamentu governu prepara ba sira nia viajen despeza tuir dalan nian hamutuk 16,000 USD, bainhira to’o tiha Brazil klube sei haree sira nia moris durante sira treinu no sira ba hamutuk ho treinador ida hamutuk nain tolu.
Iha fatin hanesan jogador Norberto Olivio da Costa hatete, nia sente kontente tanba bele hetan oportunidade husi Governu hodi ba tuir treinamentu futebol iha Brazil
“Ha’u sente kontente tebes tanba bele hetan oportunidade ne’ebe diak atu ba tuir formasaun iha Brazil, ami sei hatudu performa diak no embaixador diak iha Brazil para fo oportunidade ba jogador sira seluk tuir mai tanba ida ne’e ohin SEJD koalia ba ami no ami sei aplika fali iha Brazil”, tenik nia
Iha sorin seluk reprezenta familia jogador João da Costa, sira sente haksolok no agradese ba governu tanba bele akomoda sira nia oan ba treinu iha Brazil.
“Nu’udar familia ami sente haksolok tanba iha historia Munisipiu Baucau, ita nia governu bele akomoda ami nia oan sira ba treinu iha Brazil tan ne’e ami agradese ba governu no ami husu ba ami nia oan sira ba treinu diak para loke dalan ba Timoroan sira seluk”, João hateten
João akresenta, sira nia esperansa mak sira nia oan ba atu aprende buat ruma karik la sai jogdor diak, bele sai sidadaun diak ba nasaun no povu timor.
Reportajen: Augusto dos Santos