Partisipa Sea Games 2023, Atleta Felisberto Husu Governu Apoiu Maximu Ba Preparasaun
Imajen: Treinador atletizmu Odete Belo ho atleta nain haat iha Jinajiu Desportu Dili sesta (3/02/2023).
SAPNewsTL, Dili: Atleta Atletizmu Felisberto de Deus husu governu apoiu maximu ba preparasaun nune’e bele partisipa Sea Games 2023 iha Cambodia tinan ne’e hodi hatudu rezultadu diak hamorin Timor-Leste nia naran iha sudeste aziatiku.
“Ha’u husu nai ulun sira atu tau matan ba ami nia preparasaun para atu nune’e ami, atleta sira hatudu prestasaun iha Sea Games Cambodia tinan ne’e”, dehan atleta Felisberto de Deus ba jornalista sira iha jinajiu desportu Dili sesta (3/01/2023).
Felisberto hatutan, agora sira nia preparasaun la’o normal hela no sira hatene katak Sea Games Cambodia tinan ne’e besik daudaun ona.
Iha fatin hanesan treinadora atletizmu Odete Belo dehan, sira nia atleta treinu la’o baibain maibe preparasaun ba Sea Games Cambodia tinan ne’e seidauk tanba hein hela informasaun husi CDTL
“Durante ha’u nia atleta sira treinu iha Gleno la’o baibain tanba sira hatene an nu’udar atleta maibe preparasaun ba Sea Games Cambodia tinan ne’e seidauk la’o ne’ebe ami hein hela informasaun husi CDTL katak sira dehan prepara ona ami la’o ona”, tenik Odete
Treinadora informa, atleta ne’ebe nia prepara ba Sea Games Cambodia tinan ne’e hamutuk nain haat feto ida no mane nain tolu, husi atleta sira ne’e foun nain rua, atleta rua seluk inklui Felisberto de Deus ne’ebe tinan kotuk partisipa Sea Games tinan kotuk iha Vietnam.
Entretantu, Sekretaria Estadu Juventude no Desportu (SEJD) Abrão Saldanha haktuir orsamentu ba preparasaun hamutuk 82.000 USD maka transfere ona ba CDTL
“Ohin lansa preparasaun atleta ba Sea Games iha tinan ne’e, ami mai haree atleta sira husi modalidade Karate-Do, Taekwondo, voleibol praia ho boxing no planu tan sei ba haree sira seluk tan ne’ebe ami sei avalia hamutuk ho treinador no jestor sira kada modalidade oinsa prepara diak ba kompetisaun ne’ebe orsamentu ba preparasaun ita nia governu apoiu 82.000 USD transfere ona ba CDTL”, dehan SEJD Abrão Saldanha ba jornalista sira iha jinajiu desportu Dili sesta (3/02/2023).
Reportajen: Augusto dos Santos