Kontrata Michel Husi França, SLB Rejistu Jogador Estranjeiru Na’in Tolu
Imajen: Jogador Estranjeiru Michel Jules Hutabarat
SAPNewsTL, Dili: Klube AD SLB Laulara asina kontratu jogador estranjeiru Michel Jules Hutabarat husi nasaun França ne’ebe klube ne’e sei rejistu jogador estranjeiru nain tolu iha orgaun Liga Futebol Timor-Leste (LFTL) para kompete iha divizaun dahuluk Liga Timorense epoka 2023.
“Ami foin asina kontratu ho jogador estranjeiru ida husi França Michel Jules Hutabarat ho pozisaun Avansadu ne’ebé sei hamutuk ho jogador estranjeiru Baka ho Andrew para reforsa ekipa hodi kompete iha divizaun dahuluk Liga Timorense epoka 2023”, Sekretariu Jeral AD SLB Laulara Domingos Caeiro ba jornalista SAPNewsTL via whatsApp sesta (3/02/2023).
Sekretariu Jeral hatutan, sira agora kontratu ona jogador nain-24 inklui estranjeiru nain tolu ne’e, maski kalendariu ba kompetisaun ne’e fulan rua deit maibe sira nia jogador sira halo kontratu ba fulan tolu, jogador estranjeiru Michel Jules Hutabarat antes ne’e joga iha klube GSC (Geelong Soccer Club) iha Australia no jogador estranjeiru rua seluk ne’e tinan hirak liu ba reforsa hela ekipa.
Domingos akresenta, jogador nain-24 ne’e AD SLB Laulara nia esperansa ba kompetisaun tinan ne’e hases an husi degradasaun no bele sai kampiaun iha kompetisaun ne’e.
Reportajen: Augusto dos Santos