SEJD-CDTL Lansa Preparasaun Atleta Kompete SEA Games 2023

SAPNewsTL, Dili: Sekretariu Estadu Juvetude Desportu ho Konfederasaun Desportu Timor-Leste (CDTL sigla portuges) lansa preparasaun atleta Timoroan hodi kompete SEA Games 2023 iha Cambodia iha fulan maiu tinan ne’e.

“Ohin lansa preparasaun atleta ba Sea Games iha tinan ne’e, ami mai haree atleta sira husi modalidade Karate-Do, Taekwondo, voleibol praia ho boxing no planu tan sei ba haree sira seluk tan ne’ebe ami sei avalia hamutuk ho treinador no jestor sira kada modalidade oinsa prepara diak ba kompetisaun ne’ebe orsamentu ba preparasaun ita nia governu apoiu 82.000 USD transfere ona ba CDTL”, dehan SEJD Abrão Saldanha ba jornalista sira iha jinajiu desportu Dili sesta (3/02/2023).

Sekretariu Estadu hatutan, orsamentu preparasaun governu manda ona ba CDTL depois mak sira jere ho federasaun sira ne’ebe halo preparasaun ne’e atleta sira ne’ebe atu partisipa SEA Games tinan ne’e preparasaun mak determina sira.

Iha fatin hanesan Prezidente CDTL Macario F. Sanches hatete, planu governu prepara modalidade hitu maibe komite olimpiku aprezenta modalidade tolu tan ne’ebé iha modalidade sanulu no hein iha fulan marsu ka abril sei hetan atleta kualidade para kompete iha Sea Games tinan ne’e.

“Agora ita prepara modalidade hitu tuir planu governu nian maibe komite olimpiku aprezenta modalidade tolu, ita nia modalidade sanulu mak sei kompete iha Sea Games, ohin ita konsentra  iha lansamentu ba preparasaun ne’e, hein katak iha fulan marsu ka abril ita sei hetan atleta kualidade para kompete iha Sea Games Cambodia tinan ne’e”, tenik prezidente

Macario aumenta tan, modalidade sira ne’ebe atu ba partisipa SEA Games tinan ne’e maka federasaun voleibol, taekwondo, boxing, Fhakuptil, natasaun, karate, siklismu, futebol no atletizmu no atleta husi modalidade sira ne’e hamutuk nain-27 ho treinador nain-13 mak halo preparasaun to’o iha fulan abril mak foin bele hatene numeru hira mak fiksu partisipa SEA Games tinan ne’e.

Iha sorin seluk treinador Mario Bento voleibol praia dehan, sira nia preparasaun dezde fulan janeiru ne’ebe sira halo treinu dala tolu kada semana tanba orsamentu preparasaun seidauk iha

“Ami nia atleta sira nia preparasaun dezde fulan janeiru, semana ida dala tolu husi segunda, kuarta no sexta tanba orsamentu preparasaun seidauk iha ne’ebé agora ami prepara atleta nain neen maibe atu aranka nain haat  deit”, Bento hatete

Treinador informa, sira husu governu para fo tempu ba atleta nain neen halo preparasaun to’o atu aranka ba SEA Games lori nain haat no atleta sira ne’e mesak mane deit feto la iha tanba iha difikuldade orsamentu.

Reportajen: Augusto dos Santos