Partisipa Simeira ASEAN-Rusia ! Autoridade Simu Xanana Ho Parada de Onra
Imajem: Primeiru-Ministru Timor-Leste, Kay Rala Xanana Gusmão to’o ona iha Aeroportu Internasionál Kazan, simu direta hosi reprezentante Prezidente Federasaun Rúsia Vladimir Putin no akompaña ho parada de onra. Rusia, 17/06/2026. Foto: Media’GPM
SAPNewsTL, Rusia : Primeiru-Ministru Timor-Leste, Kay Rala Xanana Gusmão ho delegasaun to’o ona iha Aeroportu Internasionál Kazan, Rusia ho Turkish Airlines. Iha serimónia resepsaun simu direta hosi reprezentante Prezidente Federasaun Rúsia Vladimir Putin no akompaña ho parada de onra.
Prezensa Xefe Governu Timor-Leste iha Rusia hodi partisipa eventu Simeira Aniversáriu bá dala-35 Relasaun sira ASEAN-Rúsia nian ne’ebé hala’o iha Kazan, Repúblika Tatarstan entre loron 17-19 fulan-Juñu tinan 2026.
Iha eventu ne’e, PM Xanana sei hamutuk ho líder sira hosi nasaun membru Association of Southeast Asian Nations no Prezidente Vladimir Putin atu diskute relasaun no kooperasaun entre ASEAN no Rusia.
Summit ASEAN–Rusia konsidera nu’udár plataforma importante atu hametin amizade, diálogu polítiku no kooperasaun ekonómika entre rejiaun Sudeste Ázia no Rusia.
Iha enkontru ne’e, líder sira sei aborda asuntu importante sira hanesan seguransa rejionál no globál, investimentu no komérsiu, enerjia, edukasaun, teknolojia, saúde públika, konektividade, infraestrutura no kultura.
Objetivu prinsipál hosi summit ne’e atu reforsa relasaun diplomátika entre ASEAN no Rusia, promove kresimentu ekonómiku hamutuk no kontribui bá manutensaun páz no estabilidade iha rejiaun.
Bá Timor-Leste, ASEAN kontinua sai plataforma estratéjika atu hasa’e ekonomia, dezenvolve kapasidade nasionál, hametin relasaun internasionál no asegura dezenvolvimentu sustentável.
Durante summit sei realiza mós sesaun painél no meza-redonda sira ne’ebé diskute parseria entre ASEAN no Eurasian Economic Union, kriasaun espasu komérsiu no investimentu komún, kuidadu saúde, kooperasaun enerjia no indústria, dezenvolvimentu dijitál, inteligénsia artifisiál (AI), seguransa ai-han, no konektividade transporte no lojístika.
Integrasaun iha Eurasia sai mós tema importante iha fórum ne’e. Prosesu ne’e involve esforsu nasaun sira iha Europa no Ázia atu hametin kooperasaun ekonomia, polítika, seguransa no infraestrutura.
Organizasaun sira hanesan Eurasian Economic Union, Shanghai Cooperation Organisation no Belt and Road Initiative konsidera nu’udár ezemplu importante hosi integrasaun rejionál ne’ebé promove komérsiu, investimentu, konektividade no estabilidade.
Governu Timor-Leste haree esperiénsia integrasaun Eurasia nu’udár referénsia importante bá prosesu integrasaun rejionál iha ASEAN liu-liu atu reforsa kooperasaun ekonómika no dezenvolvimentu nasionál.
