LFTL-FFTL Sei Forma Orgaun Regulador Ba Liga Timorense 2022-2023

SAPNewsTL, Dili: Liga Futebol Timor-Leste (LFTL) ho Fedarasun Futebol Timor-Leste (FFTL) sei forma orgaun regulador iha semana oin para bele halo jestaun ba Liga Timorense epoka 2022-2023.

“Ohin ami halo ona akordu ho FFTL, federasaun aseita ona katak komesa aban orgaun liga sei aprezenta estrutura sira, kada komisaun sira ne’ebe mak iha responsablidade ba Liga Timorense epoka 2022-2023, depois federasaun sei nomeia kordenador jeral ba ekipa jestaun ne’e, ema ne’e iha ona maibe ita hein de’it ninian legalijasaun iha semana oin no bele sedu liu, bele semana ida ne’e nia laran, iha ona orgaun regulador depois ita bele realiza liga ida ne’e”, dehan Prezidente Interino LFTL, Octavio da Conceicão ba jornalista iha edifisiu Xanana Sport Center tersa (17/01/2023)

Prezidente ne’e hatutan, iha hanoin balun katak iha epoka tinan ida ne’e, sei diriji husi ekipa jestaun ida ne’ebe mak nomeia ona husi FFTL hanesan orgaun regulador para atu bele halo jestaun ba liga durante epoka ida ne’e tanba kondisaun estrutura mak liga oras ne’e la la’o, depois de prezidente liga sesante Nilton Gusmão, rejigna an no Vise prezidente dahuluk Germano fila hikas ne’ebe mak tuir estatutu LFTL nian vise-prezidente daruak laiha kompeténsia para atu lidera liga tanba ne’e mak hamosu ekipa jestaun ida para depois bele lidera ba liga epoka ne’e.

Octavio informa, ohin orgaun Liga LFTL hamutuk ho sekretariu jeral FFTL kolia liu kona ba asuntu tekniku ba realizasaun kompetisaun ba epoka 2022-2023 no kestaun tekniku ne’e liga ho apoiu sira ne’ebe maka atu fo ba klubu sira no mós apoiu sira ba ekipa jestaun sira ne’ebe mak atu lidera kompitisaun ne’e rasik.

Repotajen: Antonio Altamirando & Antonio Tilman