Kombate Moras Dengue Iha TL, Biocentis Prontu Apoia Ministériu Saúde

SAPNewsTL (Dili) : Médiku espesialista na’in-tolu hosi kompañia Biocentis Imperial College United Kingdom,  hala’o enkontru ho Prezidente Repúblika, José Ramos-Horta, iha sorumutu refere sira manifesta prontidaun atu apoiu Ministériu Saúde hodi kombate moras dengue iha Timor-Leste.

Tuir Chief Executive Officer hosi kompañia Biocentis, Giorgio Rocca hakleken, objetivu husi hasoru malu ho Xefe Estadu ne’e, atu ko’alia kona-ba sira apoiu ne’ebé atu fó bá governu Timor Leste.

“Depois de enkontru sei haree uluk lai ita-nia governu nia kapasidade, atu ita bele atende moras dengue ne’e, depois sira-nia ekipa sei diskuti rona hosi ita-nia parseiru WHO, Kruz Vermella ne’ebé durante ne’e ajuda governu halo atendimentu ba kombate dengue, sira sei rona uluk hosi sira depois saida mak sira bele halo,” dehan Giorgio Rocca iha Palásiu Prezidensiál Nicolau Lobato, Dili, 4 Setembru 2022

Iha Sikun seluk, Head of Strategy, Federico Guelpa reforsa, sientísta hosi kompañia Biocentis hosi Reinu Unidu, hakarak atu utiliza sira-nia ekipamentu moderna ne’ebé bele redús “mosquito” liu-liu “aedes aegypti” ne’ebé bele hamosu dengue.

“Ami mai atu introdús ba señór Prezidente, depois sei ba hasoru Ministériu Saúde, possibilidade ami bele kolleta dadus hosi ita-nia governu depois mak ami bele uza ami-nia teknolojia iha ne’e ga la’e,” tenik Federico Guelpa.

Entretantu, Xefe Estadu, José Ramos-Horta mós husu médiku Biocentis sira atu servisu hamutuk ho Ministériu Saúde ho OMS atu implementa teknolojia foun hosi kompañia Biocentis ne’e hodi kontribui ba redusaun moras dengue iha Timor-Leste.

Enkuantu, Profissionál saúde hirak ne’e sei hasoru malu ho ministériu saúde no reprezentante Organizasaun Mundiál Saúde – OMS iha Timor Leste hodi deskuti inisiativa ida ne’e.

Jornalista : Vinsensius Saldanha Morais De Araujo

Editor     : Ekipa Editoria