Kondekora Embaixador Kim Jeong, Korea Sul Mantein Prontidaun Apoia TL

SAPNewsTL, Dili :Prezidente Repúblika, José Ramos-Horta, atribui medalla méritu ba Embaixadór Korea do súl iha Timor-Leste, Kim Jeong Ho, atribuisaun ne’e nu’udar rekoñesimentu ida ba diplomata ne’ebé mak remata ona missaun iha Timor-Leste.

“Ha’u hahú ne’e kedas iha primeiru mandatu, tanba sira mai reprezenta sira-nia rain no sira ida-idak, hotu-hotu halo kompromísiu buka hametin relasaun ho Timor-Leste, entaun kuandu sira fila, ne’e buat ida ita Timor-Leste bele halo, nu’udar estadu, nu’udar governu halo kondekorasaun ba sira-nia servisu no sira sei lembra sempre ida-ne’e,” hatete Prezidente Horta.Palásiu Prezidensiál Nicolau Lobato, Dili, 07 Janeiru 2023

Prezidente Ramos-Horta hatutan, diplomata sira-ne’e, reprezenta sira-nia Xefe Estadu hodi hala’o missaun diplomátika Timor-Leste no presiza rekoñese servisu ne’ebé halo ona iha Timor-Leste.

“Embaixadór nia reprezenta nia nasaun, nia estadu reprezenta Xefe-de-Estadu, ne’e duni ha’u uluk kedas nu’udar Ministru Negósiu Estranjeirus, Prezidente, ha’u nunka falta resessaun ruma ké embaixada ruma oferese, tanba ne’e hatudu amizade respeitu ba rai ne’e,” dehan Xefe Estadu.

Medalla méritu kria liu husi dekretu lei númeru 15/2009, hodi agradese militár, polísia no sivíl ne’ebé serbi nasaun bá refosu ordem sosiál no asaun ne’ebé kontribui ba pás no estabilidade nasionál no mós simboliza gratidaun ba sidadaun ne’ebé dezempeña papél ativu, kruxiál iha dezenvolvimentu demokrásia iha Timor-Leste.

Entretantu, Embaixadór Korea do súl iha Timor-Leste, Kim Jeong Ho, agradese ba Prezidente Repúblika, José Ramos-Horta, ne’ebé mak atribui ona medalla méritu no rekoñesimentu ba nia servisu durante tinan rua ho balun iha Timor-Leste.

“Ha’u agradese tebes ba na’i Prezidente-da-Repúblika ne’ebé mak mai na’in-rua hamutuk durante fulan 26 nia laran iha ne’e, ba di’ak tomak ne’ebé mak eselénsia halo ba ha’u. Mezmu ké tinan rua ha’u la halo buat barak, maibé, agradese tebes bele oferese medalla ida-ne’e ba ha’u, onra tebes ba ha’u, no ha’u dejeza nafatin prosperidade entre Timor-Leste no Korea ba futuru,” hatete Embaixadór Korea do súl ne’e.

Kim Jeong Ho deklara prontidaun governu Korea Sul hodi apoia adezaun Timor-Leste nian ba ASEAN, no apoiu iha área saida de’it mak Timor presiza.

Diplomata ne’e dehan, fízikamente nia husik hela Timor, maibé, nia nia fuan sei nafatin iha ba Timor-Leste, tan ne’e, prontu atu sai embaixadór boavontade Korea, atu promove Timor iha Korea, nune’e bele hametin liután lasu entre nasaun rua ne’e ba futuru.

Entretantu, iha serimónia kondekorasaun ne’e, partisipa husi kórpus diplomátikus sira no seluk tan.

Jornalista : Vinsensius Saldanha Morais De Araujo