Konflitu Ukraina-Rusia Lori Impaktu, PR Horta Ho PM Ardern Diskute Relasaun Bilateral
SAPNewsTL (ONU): Hafoin Partisipa Iha Asembleia Jerál Organizasaun Nasoens Unidas (ONU) ba dala-77 iha Nova Iorke Estadu Unidus Amérika. Prezidente Repúblika, José Ramos-Horta, hala’o enkontru bilateral ho Primeira-Ministra Nova Zelándia, Jacinda Ardern
Enkontru ne’e, partisipa husi Ministra Negósiu Estranjeiru no Kooperasaun, Adaljiza Magno no Embaixadór Timor-Leste ba ONU, Carlito Nunes, no seluk tan.
Prezidente Repúblika, José Ramos-Horta informa, enkontru ho Primeira-Ministra Nova Zelándia, ko’alia liu kona-ba situasaun internasionál, liu-liu kona-ba funu entre Ukránia ho Rússia ne’ebé fó impaktu ba mundu inklui, Timor-Leste.
“Ami ko’alia liu-liu kona-ba situasaun internasionál balun, klaru hotu-hotu ko’alia kona-ba problema boot iha Ukránia, tanba konflitu Rússia ho Ukránia ne’e impaktu ba mundu tomak inklui ba ita, através de problemas, sansoens, komérsiu internasionál hetan impaktu entaun folin sasán sa’e iha mundu, Timor-Leste nia pozisaun klaru ba ida-ne’e. Maibé, ko’alia mós kona-ba Myamar, ita labele ko’alia de’it kona-ba funu iha dok hanesan Ukránia, maibé la ko’alia kona-ba buat ne’ebé akontese iha ASEAN nia klaran hanesan Myanmar,” informa Prezidente Horta., iha Nova Yorke, 24 Setembru 2022
Xefe Estadu konsidera, relasaun bilateral Timor-Leste nian ho Nova Zelándia hanesan prioridade nasionál hanesan mós Austrália ho Indonézia no seluk tan.
“Relasaun bilateral ho Nova Zelándia, ha’u konsidera hanesan prioridade nasionál importante hanesan ita-nia relasaun ho Austrália, importante hanesan ita-nia relasaun ho Indonézia no rai sira seluk hanesan Singapura. Maibé haree mós ba possibilidade Timor-Leste ho Nova Zelándia atu inkrementa liu-tán relasaun bilateral, ne’e mak ko’alia di’ak ho señora Primeira-Ministra Nova Zelándia,” Tenik PR Horta.
Ramos Horta Akresenta, Maske nasaun ne’ebé ki’ik no la viziñu ho Timor-Leste, PR Horta dehan, Nova Zelándia mós fó apoiu makas tebes ba Timor Leste dezde iha tempu luta, tanba iha 1999 Nova Zelándia ho nasaun sira seluk mak halo negosiasaun no mediasaun hodi hatama forsa INTERFET mai Timor-Leste.
Xefe Estadu Timor Leste ne’e fundamenta, iha krize 2006, Nova Zelándia mos kontinua apoiu forsa mai Timor-Leste hodi fó apoiu seguransa iha Timor to’o hetan solusaun nasional.
Jornalista : Vinsensius Saldanha Morais De Araujo.
Editor : Ekipa Editorial