Koordenador EBF Barikafa Agradese Ba Governu
SAPNewsTL,Lautem: Koordenador Ensinu Baziku Filial (EBF) Baricafa Adão dos Santos agradese ba governu tanba bele halo ona lansamentu fatuk dahuluk ba konstrusaun ba edifisiu foun EBF.
Iha entrevista ho Koordenador Eskola Ensinu Báziku Filial Baricafa Adão dos Santos haktuir nia sente orgullu no fo agradese ba governu tanba iha tinan 2024 ne’e bele halo tan konstrusaun ba edifisiu foun EBF Baricafa nian.
“Ha’u agradese ba governu, ha’u orgullu tebes tanba bele oferese tan konstrusaun edifisiu iha tinan 2024 ne’ebé ohin halo ona lansamentu primeira pedra liu husi projetu PNDS”. Dehan Koordenador Eskola EBF Baricafa Adão dos Santos iha Edifisiu EBF Baricafa, Postu Administrativu Luro Munisipiu Lautem, 27/02/2024
Koordenador EBF Baricafa ne’e hatutan nia sente sufisiente ona ba sala de aula Ensinu Baziku Filial Baricafa nian tanba ida finaliza ona, ida seluk sei iha faze konstrusaun.
“Ha’u hanoin agora sufisiente ona tanba ami hetan tiha unidade ida kompostu husi sala tolu ami utiliza ona, ida sei iha faze konstrusaun no ida seluk foin lansa primeira pedra ida ne’e sufisiente ona”. Tenik Koordenador Adão
Iha fatin hanesan, Diretor Edukasaun Munisipiu Lautem Rui Manuel Miranda da Costa Branco mos agradese tanba Autoridade lokal sira komesa prioritiza ona seitor edukasaun nune’e iha tinan 2023 alokasaun orsamentu 48 % husi PNDS ne’e koloka ba area edukasaun.
“Husi Edukasaun agradese ba esforsu ne’ebe Xefe Suku no Xefe Aldeia sira prioritiza tan fatin ba edukasaun ida ne’e importante, ikus ikus Administrador hamutuk ho Xefe Suku komesa prioritiza ona nune’e maka iha 2023 orsamentu PNDS 48 % koloka ba area edukasaun, agradese tanba pela primeira vez 48 % aloka duni area edukasaun tanba edukasaun ne’e la’os ministeriu nia servisu de’it maibé iha mos area ne’ebe tuir lolos PNDS tenke tau, ida ne’e komunidade sira komprende ona tanba se edukasaun laiha dezenvolvimentu mos susar oituan”. Diretor Informa
Nune’e mos Xefe Unidade Planeamentu PNDS Nasional Marito Alves sente kontente tanba komunidade Baricafa fo uluk prioridade ba area edukasaun iha sira nia Suku.
“Ha’u kontente tebes tanba iha Suku Baricafa inan aman sira komunidade sira hili ona setor eduksaun sai hanesan prioridade iha Suku laran, ida ne’e di’ak tebes, estrada edukasaun sira ne’e prioridade ne’ebe tenke halo uluk hafoin halo sira seluk”. Marito hateten
Jornalista: Luis Pailofo