Manifestasaun Save Asegura Povu Nia Osan, MT-RDTL : Povu Lakon Esperansa

SAPNewsTL,DILI- Movimentu Tane RDTL hala’o konferensia imprensa relasiona Estudante no Universitariu sira ne’ebe mak hala’o manifestasaun hodi asegura povo nia osan husi grupu elit, Tuir porta voz Bento Alberto Carlos hateten manifestasaun ne’ebe mak hala’o husi joventude no Universitariu sira ne’e atu asegura povo nia osan

“Relasiona ho asaun pasifiku ne’ebe organiza husi AMN (Aliansa Maubere Nasional), Joventude no Universitariu sira hotu durante loron hirak nia laran, ho objetivu atu asegura povu Timor-Leste nia osan husi grupu elite sira nia interese, PN laiha pensamentu rasional hodi realiza komprimisiu nasional ba libertasaun do Povu, nune’e bele atinji objetivu do estadu ne’ebe preve iha konstituisaun RDTL artigu 6.”Dehan porta voz movimentu Tane RDTL Bento Alberto Carlos ba Jornalista sira iha salaun assosiasaun HAK,Quarta-feira(16/11/2022)

Nia haktuir katak representante povu la tau seriedade no la halo fiskalizasaun ba problema ne’ebe mak povu hasoru iha baze hanesan edukasaun

“Movimentu Tane RDTL hare katak reprezentante povu iha uma fukun PN laiha ona seriedade, tanba ita hatene PN hanesan orgaun Fiskalizador maibe to’o agora PN la hala’o fiskalizasaun ikus mai mosu problema hanesan,prosesu edukasaun iha VII Governu grave teb-tebes, tanba Ministerio Educasaun Sr. Armindo Maia nomea fali funsionariu kontratadu ba Kordenador no director da eskola inklui Gat, pior liu kontratadu sira mak halo avaliasaun dezempenho ba Profesor permanente ho level 5, PN rasik lahatene”. Nia informa

Nia dehan tan katak povu lakon esperansa tanba nafatin halerik ba infraestrutura hanesan iha suku Manelobas ne’ebe mak seidauk asesu ba lina eletresidade

“Povu Suku Manelobas ne’ebe hanesan mate restu husi Posto Administrativo Maubisse, Municipiu Ainaru ba luta libertasaun da patria, durante ne’e halerik hela ba Ahi no Estrada, Deputadu sira lahalo fiskalizasaun maibe sira diskuti maka Pazero halo Povu Suco Manelobas lakon esperansa iha nia rain rasik”. Tenik nia

Porta vos ne’e salienta katak PN representante povo tenke diskute politu desenvolvimentu no hapara sosa kareta no laptop no halakon lei pensaun vitalisia

“Movimentu Tane RDTL husu ba PN Halakon Lei Pensaun Mensal Vitalisia, Hapara tradisaun sosa kareta no leptop,PN tenke konsentra ba diskuti politika dezenvovimentu nasional,laos koalia fali maka luta no terus tanba estadu rekonhese ona” Nia hakotu

Enkuantu, Tuir informasaun ne’ebe SAPNewsTL asesu katak Parlamentu Nasional liu husi debate espesialidade hapara ona orsamentu ba sosa kareta no laptop foun ba deputadu sira

Jornalista  : Antonio Tilman

Editor        : Ekipa Editorial