ME Inaugura Edifísiu Eskola 5 Iha Lautém
SAPNewsTL, Lautem: Ministeriu Edukasaun liu husi Diretor Nasional ba Dezenvolvimentu Parke Eskolar Helio Lopes halo inaugurasaun ba eskola hamutuk lima iha Lautem ne’ebe durante ne’e konstrui liu husi Programa Konstrusaun no Reabilitasaun Infraestrutura Edukativa (PKRIE) iha Munisipiu Lautem
Iha diskursu Diretor Nasional ba Dezenvolvimentu Parke Eskolar Helio Lopes hateten projetu komunitariu ba tinan 2021 nian iha munisipiu Lautem hamutuk sanulu resin ualu ne’ebe mak konstrui husi grupu komunitariu
“Iha Lautem projetu hamutuk sanulu resin ualu (18) iha tinan 2021 kuaze por volta de 1.7 milhoes dollar mak ita aloka ba iha munisipiu Lautem ba reabilitasaun no konstrusaun edifisiu escolar ho total sala de aula atus ida resin, Postu Luro iha projetu haat ne’ebe mak iha tinan 2021, ba 2023 ita iha projetu ualu (8) ho alokasaun orsamentu 651 mil ba projetu ualu”.
Diretor Nasional ba Dezenvolvimentu Parke Eskolar Helio Lopes saran lia hirak ne’e liu husi nia diskursu hafoin halo inaugurasaun ba eskola lima iha Ensino Básico Filial Abere, Postu Administrativu Luro, Munisipiu Lautem, 11/09/2023.
Diretor Nasional ne’e mos agradese ba estrutura grupu komunitariu sira ne’ebe mak servisu hamutuk hodi bele finaliza projetu hodi bele inaugura atu estudante sira bele utiliza ba ensinu aprendijazen
“Agradese tebes ba estrutura grupu komunitariu ba eskola lima nian ne’ebe servisu hodi finaliza projetu ne’e no ohin ita halo inaugurasaun iha fatin ida ne’e maske la ba vizita eskola lima ne’e ida por ida, ha’u fiar katak projetu hirak ne’e konkluidu”. Diretor hatutan
Iha fatin hanesan, Diretor Edukasaun Munisipiu Lautem Rui Manuel Maria da Costa Branco hateten eskola foun ne’ebe inaugura dadauk ne’e hamutuk lima husi projetu komunitariu tinan 2021 ne’ebe hamutuk sanulu resin neen iha munisipiu Lautem
“Projetu ida ne’e projetu 2021 ninian i projetu sanulu resin neen 2021 nian ne’e finaliza hotu ona, ohin ita naugura ne’e eskola lima falta ida de’it mas 90 % ona ne’ebé ha’u hein katak fim do mes selae Outobro bele finaliza ona”. Diretor Rui informa
Diretor Edukasaun Munisipiu Lautem ne’e mos agradese ba na’in ba rai no inan aman sira ho ekipa ne’e servisu hodi bele konklui konstrusaun eskola hodi oan sira bele utiliza
“Na’in ba rai ne’ebe oferese rai hodi konstrui edifisiu ne’e ita agradese, agradese mos ba inan aman ekipa projetu komunitariu ba prezidente projetu organiza hodi bele konsege finaliza projetu ne’e”. Dehan Diretor
Entretantu, Prezidente Komisaun Organizadora ba Inaugurasaun Projetu Komunitariu Lima Filipe Soares haktuir inaugurasaun ne’e halo hamutuk ho eskola lima iha munisipiu Lautem ne’ebe durante ne’e koordena no bele inaugura dala ida deit iha EBF Abere
“Serimonia inaugurasaun ne’e ita inaugura ba projetu lima ne’ebé hala’o dala ida mak hanesan Escola Secundária Geral Lere Anan Timur Lospalos, Ensino Básico Central de Iliomar, Ensino Básico Central de Mehara, Ensino Pre Escolar de Mehara no Ensino Básico Filial de Abere”.nia subliña
Xefe Suku Luro, Marciano Rafael Sabino mos sente gratitude no agradese ba Ministériu Edukasaun tanba bele konstrui edifisiu ida ba alunu sira iha eskola Ensinu Báziku Fillial Abere hodi uza ba prosesu ensinu Aprendijajem
“Nu’udar Xefe Suku Luro, Ha’u agradese ba Ministériu Edukasaun ne’ebe bele hari’i Edifísiu foun ne’e ba alunu sira iha Aldeia Abere, tanba kleur tebes eskola ne’e Aat, wainhira udan tun Ita tauk tanba anin sempre mai sobu kalen sira, maibe ohin bele iha ona edifisiu ida”. Marciano Rafael Sabino hateten
Marciano Rafael mos husu ba Diretor Nasionàl hodi tau matan ba professor voluntário sira ne’ebé hanorin tinan naruk Ona maibe laiha salário, Inklui eskola ne’ebe sei menuz biblioteka, komputador no salaun enkontru
Enkuantu, konstrusaun eskola foun lima ne’e inaugura husi Diretor Nasional ba Dezenvolvimentu Parke Eskolar Helio Lopes no partispa husi Sekretariu Administrador Munisipiu Lautem, Diretor Edukasaun Munisipiu Lautem hamutuk ho ekipa, Dirijentes eskola sira iha munisipiu Lautem, Autoridade Seguransa PNTL eskuadra Luro, Inan/aman hamutuk ho estudante Secundariu no Ensinu Básico sira
Jornalista : Luis Pailofo