Média SAPNewsTL Realiza Kongresu Dahuluk, Konselleiru Pe. Mouzinho Halo Abertura
![](https://sapnewstl.com/wp-content/uploads/2022/07/index-87-650x338.jpg)
SAPNewsTL, Dili : Média Sa’ani Assamana Prazer News Timor-Leste realiza kongresu dahuluk ba periodu 2022-2025, iha diskursu abertura Konselleiru Pe. Mouzinho Pereira Lopes hateten Jornalista mai ho knaar haklaken, Jornalista presiza lee barak no tenke iha kunhesimentu klean
Tuir Konselleiru Média SAPNewsTL Pe. Mouzinho Pereira Lopes hateten jornalista mai ho knaar ida haklaken, jornalista tenke lee barak no iha kunhesimentu lingua ne’ebe klean para iha kualidade la hanesan sira seluk
“Jornalista Presiza lee barak, aktualiza beibeik leitura, atu lee barak presiza hatene lingua Portugés, Ingles no Indonésia, lian tolu ne’e ajuda imi nia kunhesimentu, se lae sai jornalista ida mamuk, ladun iha kunhesimentu klean, imi nia tempu estuda, diak se lee barak”. tenik Konselleiru Média SAPNewsTL Pe. Mouzinho Pereira Lopes iha Sede Suku Motael, sabadu, 16/07/2022
Konselleiru ne’e hatutan Doutor Google agora hatene buat hotu, la hatene husu google, informasaun mai la to’o segunda nia hatudu ona, lalika lakon tempu barak liu ba facebook, whatsApp, konta istória, hemu kafe, fuma sira, hemu tua.
“Imi ho ha’u iha mundu ida no knaar ida, knaar mak haklaken, imi haklaken iha sosiedade liga ho ekonomia, polítika, sosial, kultural iha ne’eba, ha’u hanesan Padre haklaken maromak nia futar liafuan liga ho nai maromak, ne’ebe liga ho dimensaun politika, kultura, ekonomia sosial no seluk tan”. Tenik Pe. Mouzinho Pereira Lopes iha nia diskursu abertura ba kongresu dahuluk Média SAPNewsTL iha Sede Suku Motael, Dili, 16/07/2022
![](https://sapnewstl.com/wp-content/uploads/2022/07/image-650x433.png)
Nia akresenta, jornalismu husi difikuldade baibain to’o nivel aas, jornalista sei hasoru, imi mesak labele ida, maibe jornalista presiza maromak nia tulun iha anju da guarda sira
“Maromak bolu ita atu haklaken, tau iha liafuan ida Dom Carlos Uluk temi, ‘Vox Popli, Vox Dei’, lian povu nian, lian maromak nian, povu nia lian iha sosiedade, maromak nia lian ami mak trata, diak tebes se imi hanoin katak maromak besik imi, ha’u hanesan Padre uluk ema tiru, uluk monu iha kareta, labarik sira mate iha ha’u nia sori-sorin, ha’u mak diak hela, ha’u bolu nia (anju da guarda) akompanha”. Tenik Pe. Mouzinho
Entretantu, Presidente Komisaun Organizadora Marcela Mesquita Lemos agradese ba disponibilidade Pe. Mouzinho Pereira Lopes, Presidente KONISTIL Pascoal Pinto Soares Lemos no Armindo de Jesus ne’ebe aseita e prontu sai konselleiru hodi akompanha, sai mata dalan Jornalista Média SAPNewsTL
“Jornalista SAPNewsTL hambriik ho nia moto Tan Imi, Ohin Ami, Ba Imi, Ami Prontu, Imi Nia Lian, Ita Hotu Nia Lian, ami pronto sai matan, tilun no ibun ba lian laek sira hotu ne’ebe deit no bainhira deit”.
Nia akresenta SAPNewsTL nu’u meiu komunikasaun sosiál ida ne’ebe hari’i husi estudante Universitáriu sira, Formandu Jornalizmu Profisional sira no Estudante Sekundária sira, iha ne’ebe hambriik nu’udar média ho prinsipiu Informativu, Inspirativu, Konstrutivu, Produtivu, krítiku no Edukativu hodi hari’i Sosiedade Timor-Leste ida Justu, Prósperu, Solidáriu no Fraternu.
“Objetivu fundamental ba konstrusaun SAPNewsTL sai fontes de informasaun ida mais aktivu iha sosiedade Timor-Leste hodi Kolleta, Processa, no Divulga Informasaun ba ema hotu ho lolos, momos, no interesante iha Nivel Lokal, Nasionál, Regional no Internasionál”. Dehan Marcela Mesquita Lemos iha nia diskursu
![](https://sapnewstl.com/wp-content/uploads/2022/07/image-1-650x433.png)
Enkuantu, kongresista iha kongresu ida ne’e hamutuk tolunulu resin-ida (35) inklui Xefe Aldeia Lirio Suku Motael no Konseleiru sira Média SAPNewsTL
Reporter : Ekipa Kobertura
Editor : Sergio de João Baptista Lelan