Minutu Ida Hakmatek ! Xanana : Jovens Muda Hanoin, Prepara An Hodi Serví Timor

SAPNewsTL, Dili – Durante komemora loron konsulta popular ba dala XXV, Primeiru Ministru Kayrala Xanana Gusmão deklara povu mak halo funu, povu mak hamrik, povu manan funu hodi hetan ukun rasik an, tan ne’e joven sira tenki muda komportamentu no estuda sai matenek hodi servi Rai Timor Lorosa’e.

Durante dirije minutu ida hakmatek, Xefe Governu Kayrala Xanana Gusmão husu ba joven sira atu muda hanoin no komportamentu, estuda makaas no sai matenek, tanba rai Timor-Leste sei entrega ba joven sira nia liman.

“Povu mak funu, povu mak hamrik no povu mak manan funu, ohin ita hetan ukun rasik an tanba sira mak halo funu no manan funu,  joven sira tenki muda imi hanoin no komportamentu hodi estuda sai matenek tanba rai ne’e sei entrega ba imi nia liman”. Tenik Xefe Governu Kayrala Xanana Gusmão liu hosi diriji minutu ida hakmatek iha Estadiu Munisipal Dili, 30/08/2024

Lider Nasionál ne’e deklara povu mak halo funu no povu maka heroi tanba sira mak halo funu no manan funu.

“Povu mak halo funu, povu mak heroi, tanba povu ne’e mak manan ukun an, viva povu Timor-Leste”. Xanana Deklara

Primeiru Ministru ne’e husu ba joven sira atu muda hanoin, mentalidade, kapasidade, no hahalok hodi prepara no hadia an beibeik hodi labele serví deit nia amigu maibe serví povu no nasaun ne’e tanba povu mak manan funu.

“Prepara an no prepara an, muda imi hanoin, mental, karater, kapasidade, labele hatene servi amigu deit, maibe servi rai ne’e, servi povu ne’e, tanba povu ne’e mak manan ukun an. Ita sei presiza esforsu barak,barak teb-tebes hodi lori rai ne’e ba oin, maske ita frajil maibe ita la’os estadu falladu hanesan ho país sira seluk”. Primeiru Ministru hateten

Primeiru Ministru RDTL ne’e mós fo agradese ba komunidade no solidariedade internasional ne’ebe durante tempu resisténsia luta no apoia Timor-Leste nia independénsia to’o konkista mehi ukun rasik an.

“Agradese ba solidariedade internasionál tanba ho sira nia apoia, ita bele hetan ukun rasik an”. PM Xanana fo agradese

Serimónia Solene Komemora Loron Referendum ba dala ruanulu resin-lima (XXV) ne’e ho tema “Povu Mak Funu, Povu Mak Terus, Povu Mak Manan Funu no Povu Mak Heroi Boot Ba Ukun Rasik An”.

Eventu Nasionál ne’e  hetan mós partisipa hosi Sekretáriu Jeral Organizasaun Nasoins Unidas, António Guterres, Konvidadu Internasional Ian Martim, Ministru Defeza Austrália, Prezidente Repúblika José Ramos Horta, Primeiru Ministru Kayrala Xanana Gusmão, Prezidente Parlamentu Nasionál Maria Fenanda Lay, Prezidente Tribunal Rekursu Deolindo dos Santos,

Serimónia ne’e partisipa mós husi membru Governu Dasia, membru Parlamentu Nasionál, Prezidente Partidu FRETILIN Francisco Guterres Luolo, Sekretáriu Jeral FRETILIN Marí Bin Amude Alkatiri, Tenente Jeral Falur Rate Laek, Jeneral Lere Anan Timur, konvidadu internasionál, nasionál no povu Timor-Leste.

Jornalista : Ermelinda Soares & Marciana da Conceição