MJDAC Dizemina Lei Ezekusaun OJE Ba Funsionáriu & Parseiru Sira
SAPNewsTL, Dili: Ministeriu Juventude Desportu Arte Kultura (sigla portuges MJDAC) realiza workshop hodi dizemina lei no regulamentu ezekusaun Orsamentu Jeral Estadu (OJE) ba funsionáriu ho parseiru sira durante loron tolu.
“Ami bolu atividade ida ne’e dizeminasaun kona ba lei no regulamentu administrativu liga ba ezekusaun orsamentu jeral estadu nian, nune’e funsionáriu sira iha MJDAC ho parseiru sira hatene oinsa maka implementa ezekusaun orsamentu jeral estadu atu labele hamosu irregularidade”, dehan inspetor gabinete inspesaun auditoria MJDAC João dos Santos ba jornalista sira iha Xanana Sport Center Bairro Formosa, Dili tersa (12/03/ 2024).
Inspetor hatutan, atividade ida ne’e organiza husi gabinete inspesaun auditoria MJDAC kada tinan sempre realiza depois iha dekretu lei ezekusaun orsamentu jeral estadu, sira sempre bolu ministériu finansa, sira konvida KAK atu mai dizemina lei prevensaun bazeia ba dekretu lei no. 7/ 2020 oinsa kargu xefi ho parseiru sira hatene oinsa atu prevene ba ezekuta orsamentu jeral estadu.
Nune’e labele hamosu iregularidade lei no regulamentu la fo dalan no sira mos bolu Komisaun Funsaun Públiku (KFP) mai dizemina dekretu lei kona ba kargu xefia diresaun no dekretu lei kona ba kontratu ba traballador iha administrasaun publika nian.
João informa tan, workshop ne’e realiza durante loron tolu loron dahuluk ministériu finansa mak sei aprezenta dekretu lei ezekusaun orsamentu jeral estadu ho rejime juridiku aprovizionamentu, loron daruak KAK sei aprezenta lei prevensaun no loron datoluk KFP sei aprezenta dekretu lei kona ba kargu xefia diresaun no dekretu lei kona ba kontratu traballador iha administrasaun públika nian depois internal MJDAC mos sei aprezenta standar operasaun prosedur (SOP) ba proposta sira husi parseiru sira oinsa hetan susvensaun publika husi MJDAC.
Nia afirma tan, partisipante tuir lolos atu tuir workshop ne’e hamutuk ema nain-60 maibe liu tiha ona ba ema besik atus ida mai husi funsionariu sira iha MJDAC, parseiru sira husi area juventude, area desportiva no parseiru kompania manan tenderizasaun MJDAC nian ba seguransa, sanitariu no hahan (catering) iha tinan 2024.
Reportajen: Augusto dos Santos