Ordenadu Ba Amu-Lulik ! Pe. Waldimiro Konsidera Ne’e Estadu de Vida
SAPNewsTL, Viqueque: Hafoin simu ordenasaun saserdotal husi Bispu Dioseze Baukau Dom Leandro Maria Alves, Padre Waldimiro Afonso Viana haktuir sai na’i lulik ne’e lalos opsaun ida maibe hanesan estadu de vida ida ne’ebe iha hodi servi maromak nia povu.
Padre Ordenadu, Waldimiro A. Viana sente kontente tanba bele realiza ona mehi sai na’i lulik hodi servi sarani sira, sente haksolok tanba ho maromak nia grasa liu husi esforsu naruk no luta naruk bele konkista sai padre
“Uluk nana’in ha’u sente ksolok tebes tanba ho grasa Maromak nian liu husi esforsu naruk bele realiza ona mehi sai Na’i Lulik, Na’i Lulik ne’e hanesan estadu de vida ida laos hanesan opsaun ne’ebe ita hili maibe estadu de vida ne’ebe ita atu servi.”Tenik Pe. Waldimiro Afonso Viana ba jornalista SAPNews iha Viqueque, 08/12/023
Padre Ordenadu ne’e mos husu ba sarani hotu iha Dioseze Baukau hodi kontinua halo orasaun ba nia hamutuk ho nia maluk sira hodi bele metin iha fiel ba Maromak iha misaun tomak
“Tan ne’e ha’u espera imi bele reza ba ha’u hodi sai Na’i Lulik ne’ebe fiel no firme hodi servi Maromak nia povu”. Padre Waldimiro A. Viana hateten
Kona ba dejafiu sira, Padre Waldimiro dehan dejafiu sempre iha maibe kolaborasaun ho Maromak, kolaborasaun ho familia sira no kolaborasaun ho kolega sira seminarista ne’e nu’udar save hodi hakat dejafiu hotu.
“Dejafiu sempre iha, maibe ita nia orasaun ba Maromak, ita nia kolaborasaun ho Maromak ne’e mak importante liu, ita nia kolaborasaun ho familia no kolega seminarista sira, ita bele ultrapasa problema hotu ho susesu”. Padre Waldimiro Afonso Viana sublinha
Entretantu, Diakonu nain rua ne’ebe simu ordenasaun presbiteral ne’e Dc. Justino A. de Aquino no Dc. Waldimiro A. Viana husi Viqueque no Frater nain haat ne’ebe simu ordenasaun diakonal ne’e mak Fr. Alberico da Costa husi Lautem, Fr. Canisio de Carvalho husi Uatulari, Fr. Domingos Batista Fonseca husi Soibada no Fr. Helder do Carmo Gomes Henriques husi Manatuto
Jornalista : Luis Pailofo