Orientasaun Akadémika ! Estudante Foun Sei Kuda Ai-Oan Hamatak Kampus UNTL
SAPNewsTL, Dili : Fakuldade Engenharia liu husi Assosiasaun Akadémika Assosiação Académica Estudantil no Komisaun Organizadora Orientasaun Akadémika Fakuldade Engenharia Siénsia no Teknolojia, Universidade Nacional Timor Lorosa’e (FEST-UNTL), realiza orientasaun akadémika 2024 ba estudante foun hamutuk 420.
Orientasaun akadémika tinan letivu 2024 UNTL ne’e afirma ho tema jeral ‘Formar Universitários Responsaveis, Produtivos, Inovativos, Concientes e Bom Caracter na era dizitalização’, enkuantu tema oroentasaun ba fakuldade refere maka : Orientasaun Akadémiku 2024, Dalan Ba Hametin FEST Ne’ebe Dizitalizadu, Modernizadu no Sivilizadu Iha UNTL, Esperansa Ba Sentru Ekselensia Ba Ensinu Superior iha Timor-Leste.
Iha diskursu Senadu FEST, Sergio Alves da Costa husu estudante foun sira hosi partisipa ativu no fokus hodi lori lisaun sira ne’ebe sei kari husi orador sira, tanba orientasaun akadémika ne’e uma vez iha mundu akadémiku.
“Imi tenki buka aproveita orientasaun ne’e hodi aprende no ganha lisaun ka experiensia sira ne’ebe orador sira sei fahe ba imi durante loron rua, ita rona, ita hatene no ita bele halo ka muda buat ruma iha ita nia familia, sosiedade no nasaun”. Dehan Sergio Alves iha kampus hera, 06/03/2024.
Presidente Assosiação Académica Estudantil ne’e hatutan atividade gladi orientasaun ne’e, estudante foun sira hala’o limpeza jeral, halibur ai-oan, baja, rede, simu sapeu, bote, kadernu, kapizeira, kartaun, no aisar.
“Atividade limpeza jeral ne’e hodi hamos no hadiak ambiente kampus fakuldade engenharia siénsia no teknolojia ne’ebe livre husi foer sira no duut natural sira.”
Objetivu husi halibur ai-oan ne’e nu’udar kontribuisaun husi estudante foun sira hodi asegura kampus matak, buras no freska ba komunidade akadémiku hotu iha UNTL Hera, portantu ai-oan ne’e sei kuda iha loron 11 Marsu 2024.
“Ai-oan, Baja no rede ne’ebe estudante sira halibur, ho objetivu hodi kuda iha aredor kampus fakuldade engenharia hera, enkuantu baja no rede refere uza hodi asegura ai-oan ne’ebe sei kuda hodi evite hetan estraga husi balada sira ne’ebe komunidade hera husik hela, kuda ai oan sira nu’udar opsaun ida ba asegura kampus verde no freska ba komunidade akadémiku UNTL.” Sergio hateten
Enkuantu, Estudante admitidu ne’ebe konsege registu no tuir gladi orientasaun iha fakuldade engenharia hamutuk atus haat ruanulu (420). Orientasaun akadémika tinan ne’e refere hala’o ona iha loron 7-9 fulan Marsu tinan 2024.
Jornalista : Marcela Mery da Costa