Moris Ne’e Labele Hein ! Luis Halo Negosiu Sustenta Membru Família 28
SAPNewsTL, Dili – Realidade moris obriga Aman negosiante ida husi Suku Mantane Postu Administrativu Aileu, Municipiu Aileu, la’o ho distansia dok husi nia rezidensia Ailok laran Dili hakat ain ba Merkadu Taibesi fa’an modo hodi sustenta nesesidade familia.
Negosiante Luís hateten, maske nia la’o ho distansia dok maibe, dader loron matan sa’e nia hakat ain sai husi nia rezidensia Ailok laran Suku Villa Verde, Aldeia Terus na’in, mai iha estrada bo’ot hodi bein Bemo 07 atu ba Merkadu Taibesi hodi kontinua nia atividade negosiu hanesan fa’an modo atu bele hetan netik doral $1 ka 2 hodi sustenta familia nia moris.
“Maske sente kolen, maibe hanesan negosiante ami senti toman ona ho atividade loron loron nian hodi fa’an sasan Iha merkadu atu bele sustenta familia Uma laran sasan ne’ebe iha, Merkadu Taibesi ha’u hola tutan mak fan fali maske hetan osan uitoan maibe ida ne’e realidade moris no atividade loron loron nian, iha merkadu Taibesi, dalaruma ami fa’an to’o loraik hetan 2 dolar 3 dolar laiha ami nafatin tur hodi hein komprador sira mai sosa”. Dehan negosiante Luis Mendonsa ba SAPNews Timor Leste Segunda (4/04/2024)
Iha intervista husi Jornalista SAPNewsTL Negosiante ne’e deklara, nia vida hanesan ema negosiante desde tempu Portuguesa nia halo ona atividade negosiu liu husi fa’an modo tahan no animál iha merkadu lama, hafoin Timor-Leste ukun an nia nafatin kontinua fila liman iha Merkadu Taibesi, ho pasensia atu hetan osan hodi tulun oan no beioan sira iha familia nia laran, tamba moris labele hein deit prezisa buka no pasiensia mak bele hetan,Tenik nia.
“Atividade ne’ebe ha’u hala’o, ha’u la moe tanba liu husi fila liman mak hau bele hetan osan, importante ita moris save iha ita nia liman, liman fuan sanulu ne’e mak savi, ita buka sei hetan maske la hetan osan bo’ot maibe bele tau hamutuk hola hahan no seluk bele tau fali para hola modo sira ba fa’an atu bele hetan uitoan”
Aman negosiante ne’e salienta, osan ne’ebe nia hetan atu bele sosa netik fos no modo tahan sira atu responde ba familia nia presija, Han no hemu uitoan karik familia balun mosu ba susar atu bele ajuda malu tanba modo tahan ne’ebe nia fa’an ladun hetan rendimentu diak, dalaruma fen kaben oan no beioan sira iha avo luis nia uma, hein hela nia fila husi merkadu lori modo tahan fila ba uma mak oan sira tein hodi han hamutuk.
“Ha’u iha oan 12 maibé tolu fila ba maromak nia kadunan santo nain 9 mak moris, balun eskola osan ne’ebe buka moris selu mos sira nia eskola ne’ebe la eskola mak ha’u la selu balun ajuda ha’u buka moris hanesan fan sasan, ha’u nia ferik oan iha maibe loron halimar deit iha uma ho hare beioan sira, ha’u ho oan mane sira mak ba buka moris hodi bele resolve ba problema familia uma laran nian”. Nia konta
Negosiante Luis kuda prinsipiu ida iha moris katak maske oan barak maibe nia hakarak familia moris iha paz nia laran, oan sira labele hamosu konflitu, saida mak oan sira nia hakarak nia nafatin firme hodi buka moris liu husi fila liman atu bele sustenta oan no beioan sira, iha uma laran ema barak maibe nia oan feto no mane balun forma ona familia, sira kontinua hela hamutuk ho avo luis, nia iha beioan hamutuk 28 hela hamutuk deit iha uma ida.
Avo Luis husik hela lia menon ba oan no beioan sira atu aprende buka moris ho dalan oioin atu nune’e bele sustenta familia.
“Hanesan aman ami buka hodi han hemu hodi sustenta ba familia, labele kaer ba ema nia sasan hodi ema koalia imi lalika baruk buka moris atu bele han, serbisu maka bele hetan, buka moris fan ai maran mos serbisu ida, labele buka serbisu bo’ot maibe importante hetan osan atu hadia moris no responde ba kabun bainhira hamlaha, ha’u sei moris, nafatin buka osan hodi sosa hahan tamba ha’u lakoi oan sira kesi Kabun ba hamlaha,” Hakotu Negosiante Luis.
Jornalista : Ermelinda Soares