Partisipa Asian Games, Atleta TL Sei Simu Osan Ba Hahan & Subsidiu
SAPNewsTL, Dili: Atleta Timor-Leste husi federasaun sanulu partisipa Asian Games iha sidade Hangzhou, China hahu iha loron 23 fulan setembru to’o loron 8 fulan outubru 2023 kada atleta ida sei simu orsamentu ba hahan ho montante 30 USD kada loron durante loron 49 no subisidiu 125 USD kada fulan ida durante fulan rua.
“Ita nia atleta husi federasaun sanulu kompete Asian Games tinan ne’e sei hetan subsidiu 125 USD kada fulan durante fulan rua no orsamentu ba hahan ho montante 30 USD kada atleta iha loron ida, hahan bikan ida presu 12 USD no merenda (snack) bikan ida 3 USD tan ne’e loron ida sira sei han dala rua ho merenda dala rua nune’e orsamentu ba hahan nian kada federasaun sei hetan la hanesan tanba depende numeru ba atleta ho treinador sira”, dehan Prezidente CDTL Macario F. Sanches ba jornalista sira iha nia knaar fatin Caicoli, Dili segunda (31/07/2023).
Prezidente CDTL hatutan, atleta sira nia preparasaun ba kompete Asian Games tinan ne’e iha sidade Hangzhou, China sei komesa iha loron 1 fulan agostu to’o 18 fulan setembru 2023, atividade treinamentu sei hala’o iha atleta idak-idak nia federasaun to’o preparasaun remata.
Macario informa, atleta sira oras ne’e hala’o treinamentu iha rai liur utliliza orsamentu solidaridade olimpiku kona ba hahan ho alojamentu, sira direitu CDTL prepara mak subsidiu durante fulan rua deit, kada fulan sira sei hetan 125 USD, CDTL labele oferese tan orsamentu ba hahan tanba solidaridade olimpiku fo ona no atleta sira sei hetan kontrola masimu husi sira nia treinador sira iha rai liur hamutuk ho federasaun, CDTL hein nia rezultadu progresu treinu husi atleta sira nia federasaun sira.
Iha fatin hanesan, Prezidente Federasaun Karate-Do Timor-Leste Filomeno Soares hatete, sira nia atleta nain lima ho treinador sei hetan orsamentu ba hahan ho montante 7,350 USD durante loron 49 nune’e nia sente orsamentu sufisiente ba nia atleta sira halo preparasaun kompete Asian Games.
“Ami nia atleta nain lima ho treinador sei hetan orsamentu preparasaun kada loron ho montante 30 USD ba hahan nian durante loron 49 nune’e ami sei hetan 7,350 USD ba ami sufisiente tebes ba atleta sira halo preparasaun kompete Asian Games tinan ne’e”, tenik Filomeno
Entretantu, atleta Timor-Leste husi federasaun sanulu mak sei kompete iha Asian Games tinan ne’e iha sidade Hangzhou, China mak federasaun Atletizmu, Taekwondo, Boxing, Karate-Do, Tiru, Badminton, Tenis Kampu, Natasaun, Halterifilizmu no Voleibol.
Reportajen: Augusto dos Santos