ESG Lasama Luro Fasilita Kursu Komputador Ba Estudante Na’in 120
SAPNewsTL, Lautem: Hafoin reuniaun ho inan aman sira, iha ne’ebé hotu-hotu aseita hola komputador hodi fasilita aula pratika ba estudante sira, Gabinete Diretiva Escola Secundária Geral Fernando Lasama de Luro realiza programa kapasitasaun komputador ho modelu kursu ba estudante sira.
Iha intrevista ho Koordenador Escola Secundária Geral Fernando Lasama de Luro (ESG-FLL) Adolfo Paulo Hornay haktuir programa kapasitasaun komputador ne’e realiza hodi responde ba difikuldade ezijensia estudante finalista sira ne’ebe durante ne’e kontinua estudu iha universidade difisil ba sira atu utiliza komputador tanba nunka aprende.
“Programa ne’e realiza hodi hatan ba difikuldade no ezijensia estudante finalista sira balun ne’ebe durante ne’e kontinua estudu iha universidade difisil ba sira atu uza komputador, nune’e gabinete diretiva planu realiza programa ne’e atu kapasita estudante sira para sira bele hatene utiliza komputador molok hakaat ba universidade”. Dehan Koordenador Escola Secundária Geral Fernando Lasama de Luro Adolfo Paulo Hornay iha nia servisu fatin, 13/07/2023.
Koordenador ne’e mos agradese ba inan aman husi estudante sira ne’ebe apoiu tebes programa kapasitasaun komputador wainhira hala’o reuniaun ho sira.
“Ami agradese no orgullu ba inan aman sira tanba iha reuniaun konsellu inan aman hotu-hotu apoiu hodi realiza programa kapasitasaun komputador ba estudante sira”. Nia teni
Iha fatin hanesan Formador ba kapasitasaun komputador Tito Quintas hateten iha kapasitasaun komputador ne’e kapasita estudante sira ho programa Microsoft Office mak uluk maske iha komponente barak maibe sei fo uluk komponente importante tolu molok hakaat ba sira seluk.
“Ami fo formasaun komputador ba estudante kona-ba programa Microsoft Office, maske office iha komponente barak maibe ami sei fo uluk ida ne’ebe importante hanesan word, excel no power point”. Tenik Formador
Formador ne’e mos fundamenta durante fo formasaun, estudante sira iha vontade aprende komputador tanba sira haree hanesan programa foun ba sira, nune’e sira hakarak tebes aprende no hakarak atu hatene kona-ba komputador.
“Sira iha vontade atu aprende tanba buat ida ke foun ba sira, ida ne’e mak sai hanesan fini ba sira tanba to’o tempu ida sira sai husi Sekundariu atu kontinua iha universidade tenke uza komputador”. Tito akresenta
Tito aprofunda, semana ida kada formador atende klasse haat nune’e sira hetan osan insentivu dolar atus ida kada fulan
“Ami iha estudante atus ida ruanulu (120) mak tuir formasaun ne’ebe ami formador hamutuk nain tolu kada ema ida haree estudante haatnulu ne’ebe ami hetan insentivu dolar atus ida (100) kada fulan”. Nia informa
Entretantu, estudante Arcanjo Ferreira mos agradese ba dirijente eskola ne’ebe bele realiza kapasitasaun komputador hodi fasilita estudante sira iha aula pratika kona-ba materia teknolojia multimedia.
“Ha’u agradese ba gabinete diretiva ne’ebe bele realiza programa aula pratika ida ne’e hodi ami bele aprende komputador, maske ami foin aprende maibe espera sei hetan kunesimentu natoon molok husik sekundaria ne’e”. Arcanjo hatete
Enkuantu, formasaun komputador ne’e sei fo uluk ba estudante terseiru ano sira ne’ebe besik ona atu remata sira nia estudu no sei kontinua ho estudante sira seluk iha tinan oin ne’ebe tuir planu sei fo formasaun mos kona-ba lingua ingles inklui mos lingua portugues.
Jornalista : Luis Pailofo