Paskoa Lori Naroman, Kardeal : Sarani Tenki Hatoman An Ho Buat Diak No Loos

Arsebispu Arkidioseze Metropolitana Díli, Virgílio Kardeál do Carmo da Silva, SDB

SAPNewsTL, Dili: Iha selebrasaun missa vijilia paskal – sabadu santu, Arsebispu Arkidioseze Metropolitana Díli, Virgílio Kardeál do Carmo da Silva, SDB konsidera páskua hanesan ambiente ida ne’ebé lori neineik nakukun bá naroman hodi hahú haree Jesus nia moris hias lori naroman bá sarani sira ne’ebé moris iha susar ho terus nia laran,

Iha omilia Arsebispu Arkidioseze Metropolitana Díli, Mgr. Virgílio Kardeál do Carmo da Silva, SDB, bainhira prezide selebrasaun missa Sábadu Santu hateten naroman sériu ne’e, fó naroman bá kreda tomak, maske ema ida-idak iha nia nakukun, preokupa buat oi-oin, nia husu ba sarani sira atu fo netik tempu no espasu no loke nia fuan ba maromak atu bele hetan naroman

“Kalan ida ne’e, momentu ida ne’e, mai buka bá, mai loke netik le’et oan ida, fó netik espasu ida bá naroman lilin ida ne’e nian hodi bele tama iha ema nia moris, naroman ne’e dalan ida, tan mai dere imi nia odamatan, dere imi nia fuan, atu imi labele taka imi nia fuan, maibé hamamar imi nia fuan bá, hodi naroman uitoan bele penetra iha imi nia nakukun”.Dehan Arsebispu Arkidioseze Metropolitana Díli, Virgílio Cardeál do Carmo da Silva, SDB wainhira prezide missa vijilia paskal iha igreja katedral-Dili, Sábadu, 8/04/2023.

Dom Virgilio afirma Iha tempu páskua, Maromak iha ambisaun ida de’it hakarak atu konkista mate ho moris, Maromak lakohi ema hakmatek hela iha nakukun, Maromak lakohi ema hakmatek iha kaos, Maromak lakohi ema hakmatek iha dezorden laran, maibé Maromak hakarak ema hotu moris iha naroman.

“Buat hotu Lao normal, buat hotu mamuk, Maromak haree, nakukun boot ida iha Maromak ninia oin, entaun Nia hahú buka atu haketak buat ne’ebé nakukun hosi naroman, buat ne’ebé bokon hosi rai maran no Maromak hahú tau orden, no buat ne’ebé seidauk iha orden, liu tiha Maromak haree tiha katak buat hirak ne’e furak tebes duni” Dom Virgílio teni

Cardeal ne’e fundamenta, festa Páskua ne’e mós konvida ema hotu atu hola konsiénsia kona-bá anti virus ida ne’e nostaljia bá Maromak prepara sira nia an, renova sira nia hakarak atu Jesus Nia moris hias bele halakan liután sira nia vontade, atu hakbesik no buka hodi hatoman an iha Maromak Ninia hakarak no vontade

“Ema hotu hakarak sai fila fali bá moris ida ne’ebé normal, hodi buka normaliza violénsia, ódiu, vingansa no nakukun, hatoman an ho kultura violénsia ninian tanba ne’e la’ós ema nia kultura, maibé ema nia kultura mak Maromak tanba ema hotu mai hosi Maromak nune’e buka atu hatoman an buat ne’ebé loos no di’ak”. Nia hakotu

Jornalista: João Marito