Paulo Gally Marka Golu Rua Lori Karketu Manan Aitana 3-1

SAPNewsTL, Dili: Jogador Estrela Timor-Leste Paulo Gally Freitas marka golu rua lori Karketu Dili FC manan Aitana FC ho skore 3-1 iha jornada dahaat divizaun dahuluk Liga Timorense epoka 2023.

Jogu Karketu Dili FC kontra Aitana FC hala’o iha Estadium Munisipal Dili kuarta (22/03/2023).

Iha jogu parte dahuluk bainhira kick off jogador husi ekipa rua halo jogu muda bola ain ba ain hodi halo presaun no atake ba malu ne’ebe tama minutu 3 jogador Paulo Gally Freitas husi Karketu Dili FC marka golu halo redi adversariu nakdoko hatuur kedas skore ba 1-0.

Skore refere halo jogu la’o komesa manas Aitana FC komesa halo atake maka’as ba adversariu hodi hetan oportunidade ameasa baliza Karketu Dili FC maibe tama minutu 13 Aitana FC sofre tan golu husi Karketu Dili FC husi jogador Gelvanio Alberto muda fali skore ba 2-0.

Sofre ona golu rua halo jogador sira husi Aitana FC halo presaun maka’as ba Karketu Dili FC hodi marka golu maibe jogador sira husi adversariu la fo oportunidade no jogador sira husi Karketu Dili FC mos halo kontra atake ba Aitana FC atu aumenta tan golu maibe jogador sira husi ekipa rua la marka golu tan to’o minutu 45 jogu parte dahuluk remata skore nafatin 2-0.

Kontinua ba jogu parte daruak nian ekipa rua muda estratejia jogu nian nafatin halo presaun no atake ba malu ne’ebe tama ba minutu 52 jogador sira husi Aitana halo presaun ba adversariu hodi halo jogador Karketu Dili FC Zacarias Cabral halo auto golu hodi halo nia redi baliza nakdoko hodi muda fali skore ba 1-2.

Skore 2-1 halo jogador sira husi ekipa rua hasa’e ritmu jogu nian halo atake maka’as ba malu tama ba minutu 58 jogador Paulo Gally Freitas husi Karketu Dili FC marka tan golu hodi muda fali skore 3-1, skore refere halo ekipa Aitana FC halo presaun maka’as ba adversariu hodi hetan oportunidade barak ameasa baliza maibe la konsege aumenta tan golu no jogador sira husi Karketu Dili FC mos halo kontra atake ba Aitana FC hetan oportunidade barak mos ameasa baliza adversariu maibe jogador sira husi ekipa rua la aumenta tan golu to’o minutu 90 jogu remata skore nafatin 3-1 hodi rezulta Karketu Dili FC manan Aitana hodi hetan pontu tolu iha jornada dahaat divizaun dahuluk Liga Timornse epoka 2023.

Depois jogu remata sekretariu jeral Elizeu Isaac Veloso hatete, sira konsege rekolla manan dala rua ba jogu dala haat nune’e nia agradese ba ekipa tomak.

“Jogu ba Dala haat ami konsege rekolla tan vitoria ba dala rua hetan pontu tolu aumenta ba pontu neen iha tabela klasifikasaun nune’e hau agradese ba ekipa tomak husi estrutura to’o mai jogador ho treinador sira”, tenik Elizeu

Elizeu hatutan, ohin jogador sira komesa hatudu fila fali sira nia jogu diak no jogador Paulo Gally Freitas mos komesa hetan fali ona ninia performa ida ne’e mak jogu ida tenki manan no lakon no jogu tuir mai sira sei hadia nafatin sira nia lina klaran tanba ohin jogador sira faila oituan tan ne’e treinador sei halo evaluasaun nafatin ba jogu haat tuir mai tenki manan hotu para hare’e rezultadu ikus liga nian oinsa tanba Karketu Dili FC tama fila fali ona kompetisaun ba kampiaun.

Iha sorin seluk treinador Aitana FC Jose Fonseca dehan, sira derrota tanba jogador sira nia finalizasaun mak ladun diak no sira tun fali ba zona degradasaun susar tebes ba ekipa maibe sei hare’e fali rezultadu ba jogu tuir mai nian

“Ohin derrota laos estratejia tanba ami nia jogador sira jogu domina bola maibe finalizasaun mak ladun diak no ohin ami hakarak manan para hetan pontu tolu hodi muda pozisaun hakat tan ba leten iha tabela klasifikasaun maibe derrota ne’e ami nia pozisaun tun ba zona degradasaun susar tebes ba ami maibe jogu tuir mai mak ita hare’e fali rezultadu”, Jose hateten

Jose akresenta tan, ohin sira nia jogador halo finalizasaun ba marka golu mak ladun diak ne’ebe ba jogu tuir mai sira hadia ida ne’e.

Entretantu vitoria ne’e halo Karketu Dili FC hakat ba okupa pozisaun dahaat ho pontu 6 husi jogu manan dala rua no lakon dala rua mos no derrota ne’e halo Aitana FC tun ba okupa zona degradasaun ho pontu 4 husi jogu manan dala ida, impata no lakon rua iha tabela klasifikasaun divizaun dahuluk Liga Timorense epoka ne’e no iha jogu ohin ne’e Karketu Dili FC halo substituisaun ba jogador nain tolu no Aitana FC troka jogador nain tolu, jogador Miguel Araújo husi Aitana FC hetan kartaun kinur no jogador husi Karketu Dili FC la iha ida hetan kartaun.

Reportajen: Augusto dos Santos