PD Selebra XXI Anos, Assanami  Husu Militantes Halo Refleksaun

Dili : Partidu Demokrátiku (PD) realiza Konferénsia Nasional hodi selebra ninia ezisténsia ba dala XXI, Felisita Prezidente Repúblika José Ramos Horta no reflesaun ba preparasaun eleisaun Parlamentar 2023, Prezidente PD Mariano Assanami Sabino Hateten 21 anos PD existe nu’udar jerasaun kontinuador ne’ebe atu fo kontinuasaun ba prinsipiu luta no valores heroi sira nian hodi konstrui prinsipiu no valores ne’ebe sira husik hela

“Ohin loron ida importante tebes, ita halo konferénsia, ita refleta 21 anos, tanba sá mak ita hari’i PD, ita hari’i fali PD, ita hari’i buat foun ida ho prinsipiu tuan, Partidu Demokrátika uniku Partidu ne’ebe hanesan ho vizaun estadu Repúblika Demokrátika de Timor-Leste, ita sai kontinuador la’os tanba ita idade kiik, foinsa’e maibe kontinuador tanba prinsipiu maka ita hari’i Partidu Demokrátiku”. Tenik Prezidente PD Mariano Assanami Sabino iha nia diskursu, Delta-Nova, Dili, 10/07/2022

Prezidente PD Assanami  Rekuñese Forsa, Frakeza no Modalidade ne’ebe Partidu Demokrátiku iha durante tinan ruanulu resin-ida (21) maka votus sei kiik

“Ita rekuñese ita nia forsa, ita lalika hatudu liman ba ema seluk, tanba sa povu seidauk vota no hili ita, maske ita aprezenta programa ne’ebe di’ak, iha prosesu post-konflitu no iha prosesu evolusaun ida ne’ebe povu ne’e iha, ita rekuñese katak povu ida ne’e povu ida ne’e, sei fo konfiansa nafatin ba maun sira para sira tutan no la’o hamutuk nafatin ho ita”. Tenik Assanami

Prezidente PD ne’e hatutan 21 anos mai ona halo selesaun natural ida, se mak sei nafatin hamrik iha Partidu Demokrátiku, labele izola malu maibe reflekta katak ezisténsia Partidu Demokrátiku ne’e diferente

“Ita la’os deit fokus ba kadeira, ita laos fokus oinsá ukun, maibe ita ko’alia valores, ita ko’alia konstrusaun estadu, ita nia papel diferente ho partidu hotu-hotu, númeru bele kiik, maibe labele halo politika kiik iha Parlamentu, labele hanoin manan eleisaun mas hanoin oinsá povu moris ne’e diak”. Dehan Assanami

Entretantu, Assanami afirma sei tun ba baze hodi halo avaliasaun iha kada munisipiu no postu administrativu sira hodi reflekta no prepara eleisaun parlamentar tinan 2023

Demokrasia no eleisaun katak povu goza nia liberdade, povu goza nia moris diak, Demokrasia tenki deliver moris diak ba povu ne’e maka prinsipiu fundamentu ba demokrasia

“ita tenki Demokratiza ekonomia, demokratiza sosial, demokratiza infraestrutura, kultura no tradisaun, prinsipiu demokrasia sai alvu para muda elementu hot-hotu hodi hamosu sosiedade ida modernu no demokrátiku”. Hateten Assanami

Entretantu, iha Diskursu Sekretariu Jeral PD António da Conceição Kalohan apresia no agradese ba Prezidente Repúblika Dr. José Ramos Horta ne’ebe konsege partisipa iha Konferénsia nasional Partidu Demokratiku ba dala IV

Enkuantu, Prezidente Repúblika José Ramos Horta mos orgullu no fo Parabens ba Partidu Demokrátiku ne’ebe selebra tinan ezisténsia ba dala XXI, Prezidente mos husu estrutura PD atu servisu makaas hodi aumenta tan kadeira lima iha eleisaun 2023

Jornalista : Marcela Mery da Costa

Editora     : Marcela Mesquita Lemos