Vemasse Oan Realiza Semináriu, Nivio : Jovens Tenki Prepara An no Muda Karakter

Dili : Unidade Juventude no Estudante Postu Administrativu Vemasse Realiza semináriu ho tema ‘Partisipasaun Juventude Milenial Hodi Hametin Konstrusaun Estadu’, Xefe  Programa Feliciano Soares hateten objetivu husi seminariu ida ne’e atu lider inspirador sira bele fahe no fanun joven sira prepara an no hadia nia kualidade diak ba futuru

“Liu husi seminar ida ne’e bele halibur ami juventude no estudante sira ne’ebe eskola iha Dili, Tanba durante ne’e  ladun hamutuk, mak ami kria grupu ida ne’e para atu akomula ami hotu no halo mos aktividade ne’ebe sei fo kontribuisaun ba ami nia Postu Vemasse”. Dehan Xefe Programa Feliciano Soares ba jornalista sira iha Xanana Reading Room Lecidere Dili,Sabado(09/07/2022)

Nia subliña, Semináriu ne’e nakloke ba Públiku no atividade ne’e hetan apoiu finaseiru husi inan aman, Joventude no estudante sira ne’ebe servisu no hela iha Dili

“Semináriu ne’e nakloke ba ema hotu-hotu, entaun ohin hetan partisipa husi estudante husi eskola Univesidade iha Dili laran, no Kursu sira, Laos deit ami Vemasse oan maibe akumula ema hotu no nakloke ba ema hotu”.  Hateten nia

Iha fatin hanesan Orador Sr. Nivio Leite Mangalhães hateten ohin ko’alia kona ba  partisipasaun juventudu milenial ba konstrusaun estadu, fahe esperensia balu iha seminar ne’e atu nune’e bele kontribui ba juventude sira hodi prepara an halo diak liu tan atu sai nafatin Ajente transformador, Ajente ba mudansa ba Rai ida ne’e,

“Ita hotu hatene katak juventude nia papel uluk importante tebes ba libertasaun partia no agora tenki kontinua sai nafatin autor prisipal ba libertasaun povo, Iha dezafiu barak mak nasaun ne’e hasoru joventude tenki kontribui solusaun ba problema sira ne’e no dezafiu, juventude sira tenki prepara an halo diak hasa’e sira nia konhesimentu, abilidade no tenki iha karakter ne’ebe diak hodi bele kontribui positivamente ba Dezembolvimentu Nasional.” Dehan Orador Sr. Nivio Leite Mangalhães

Orador ne’e hatutan  asuntu desempregu ne’e laos responsabilidade ema ida nia deit maibe ema hotu nian, iha parte privadu no públiku ema idak idak bele halo buat ruma no bele hadia rai ida ne’e

“Ohin ha’u fahe hanoin balu katak joventude sira labele hein deit Governo, labele hein deit setor privadu maibe sira mos bele buka dalan halo esforsu atu kria rasik servisu ba sira nia a’an no mos fo servisu ba ema seluk ezemplu halo negosiu ki’ik ruma no buka dalan asesu ba kréditu ruma, Ita hein Governu bele fornese kréditu ho funan ki’ik ba ita nia joven sira atu bele hetan rendimentu ruma ne’e importante tebes”. Hakotu nia

Enkuantu semináriu ne’e organiza husi Unidade Juventude no Estudante Postu Administrativu Vemasse no hetan partisipasaun maksimu husi estudante universitariu sira, juventude sira iha Kapital Dili

Jornalista    : Justino De Jesus Soriano & Marcela Mery Da Costa

Editor         : SAPNewsTL