PR Fornese Nesesidade Bázika Ba Kbi’it La’ek Sira Iha Area Remota
Presidensia Republika Apoia nesesidade bazika ba komunidade kbiit laek sira iha Aileu-Remexiu, 15/12/2022. Foto : Media PR
SAPNewsTL, Remexiu : Prezidénsia Repúblika apoia nesesidade bázika ba familia Lima nulu husi Aldeia Dasilelo, Suku Tulataqeu, Postu Administrativu Remexiu, Munisipiu Aileu.
Apoiu ne’ebé konstitui husi fós saka 50, mina kaixa 50 no supermi dós 50, distribui Sexta-feira ne’e, husi Sekretariu Exekutivu Xefe Kaza Sivíl Prezidénsia Repúblika, Filomeno Lay.
“Apoiu ne’e oferese husi Prezidénsia Repúblika ba ita nia komunidade sira iha Suku Tulataque ne’e, hanesan prezente ba komunidade iha loron Natál”. hateten Filomeno Lay, Remexiu, 15 Dezembru 2022
Olga Paula da Costa agradese Prezidente Repúblika, José Ramos-Horta tanba tulun ona sira ho nesesidade baziku sira.
“Ami agradese tebes ba Na’i Prezidente Avó Ramos, tanba bele apoia nesesidade bázika ba ami kbi’it laek sira iha área rurais, maske kondisaun estrada ne’ebe la di’ak, apoio hirak ne’e bele to’o mai ami nia uma, iha fatin ida né’e” agradese Olga Paul.
Entertantu, Antes ne’e, Prezidénsia Repúblika apoia ona, família vulnerável hamutuk atus rua iha Munisípiu Manatutu no sei distribui tan apoiu iha Munisípiu seluk.
Jornalista : Vinsensius saldanha Morais De Araujo