PR Horta Loke Odamatan Festa Demokrasia, ElPar 2023 Sei Realiza Iha 21 Maiu

Presidente Republika Jose Ramos Horta

SAPNewsTL, Dili : Hafoin halo dialogu no rona partidu polítiku sira iha Parlamentu Nasional, Partidu la hetan asentu, Sosiedade Sivil, Igreja Katólika no entidade relevante sira hotu, segunda-feira ne’e Presidente Repúblika José Ramos Horta dekreta ona data eleisaun parlamentar katak loron 21 Fulan Maiu 2023, Povu Timor Leste sei exerse ninia direitu votu hodi determina destinu nasaun ba Periodu tinan lima mai

Segunda Feira ne’e Presidente Repúblika marka ona data eleisaun Parlamentar (ElPar) 2023, liu husi rezolusaun ne’ebe SAP News TL asesu iha Jornal da Repúblika katak Presidente Repúblika uza ninia kompetensia tuir Konstituisaun Repúblika Demokrátika Timor Leste artigu 86⁰ aliena C hodi dekreta ona data ba Eleisaun Parlamentar

“Eleisaun Parlamentar sei hala’o iha Loron 21 Fulan Maiu Tinan 2023, tuir kompeténsia Presidente Repúblika iha artigu 86⁰ alinea C, no iha Númeru 1 artigu 17⁰,  Lei Eleitoral ba Parlamentu Nasionál ne’ebe aprovadu liu husi Lei nú. 6/2006, 28 Dezembru, Lei Nú. 5/2007. 28 Marsu, Lei Nú. 7/2011, 22 Junhu, Lei Nú. 1/2011, 13 Janeiru, no Lei Nú. 9/2017, 7 Maiu”. Haktuir husi Karta Presidensia Repúblika ba Jornal da Repúblika iha segunda feira, 13/0/2023

Presidente Repúblika husu lider polítiku sira hodi haree ba oin, kria unidade lalika haree ba governasaun kotuk ne’e, maibe hatudu matenek no fahe matenek ba povu Timor Leste

“Ha’u husu Lider Partidu Polítika sira atu respeitu malu iha kampanha, kria unidade, haree ba oin programa tinan lima mai, hatudu matenek no fahe matenek ba povu”. Dehan Presidente Repúblika José Ramos Horta ba Jornalista sira iha Palasiu Presidente Nicolau Lobato, dili, 13/02/2023

Entretantu, Daudaun ne’e Comisaun Nasionál das Eleições (CNE Sigla Portuges) no Secretariado Técnico de Administração Eleitoral (STAE sigla Portuges) hala’o ona resensiamentu eleitoral no preparativu sira seluk hodi enfrenta kampanha no eleisaun parlamentar tinan 2023 iha Territooriu Nasional

Enkuantu, Partidu polítiku sira mos hahú halo ona konsolidasaun iha baze hodi prepara an hasoru festa demokrasia refere, portantu, antes ne’e Presidente Repúblika halo mos konsultasaun ba partidu polítiku sira hanesan FRETILIN, CNRT, PLP, KHUNTO, PD, PST, PUDD, FM, UDT, Igreja Katólika inklui entidade relevante sira seluk tuir tuir kompeténsia Presidente Repúblika iha artigu 86⁰ alinea C katak Presidente Repúblika maka iha kompeténsia ”Marka tuir lei, loron eleisaun ba Presidente Repúblika no ba Parlamentu Nasionál”.

Jornalista : Vencensius Saldanha Morais