Jogu Abertura Liga Timorense 2023, Klube Aitana Kontra Porto Taibesi

SAPNewsTL, Dili: Aitana FC sei kontra Porto Taibesi FC iha jogu abertura divizaun dahuluk Liga Timorense  epoka 2023 ne’ebe jogu kick off sei monu iha loron 17 fulan fevereiru tinan ne’e no klube rua prontu kontra malu para hetan pontu tolu iha jornada dahuluk.

 “Technical meeting ida ohin hanesan prosesu ida hola parte iha prosesu  hotu bainhira Liga Timorense atu la’o ne’ebe agora klube sira iha prontidaun, katak prontu hela partisipa iha Liga Timorense 2023 ne’ebe sei abertura husi Aitana FC kontra Porto Taibesi FC maibe sira iha kestaun ezizi   sira nia suportasaun finanseiru”, dehan Diretor Relasaun Publika LFTL Diogo Neto Fraga ba jornalista sira iha Xanana Sport Center Bairro Formosa, Dili sabadu (11/02/2023)

 

Diretor hatutan, akordu ne’ebe LFTL, FFTL ho SEJD halo ona konkordansia katak iha Liga Timorense epoka ne’e klube divizaun dahuluk klube sia sei simu 20,000 USD no divizaun daruak sei klube ualu sei simu 10,000 USD, maibe FFTL iha kriteria ba klube sira sei prense antes simu finansial suportasaun ne’e.

Nia akresenta, daudaun ne’e klube balun deit mak hatama ona hein katak semana oin klube sira bele hatama ona para FFTL bele halo transferensia orsamentu ba konta bankaria klube sira nian no semana kotuk FFTL transfere ona orsamentu manajementu Liga Timorense epoka ne’e ba konta bankaria orgaun liga nian tuir proposta orgaun liga submete ba SEJD liu husi FFTL ho montante orsamentu montante 50,000 USD.

Iha fatin hanesan adjuntu sekretariu jeral FFTL Frederico Martins informa, sira anunsiu Klube sira mai hatama proposta ba FFTL maibe klube barak seidauk hatama proposta tan ne’e sira seidauk halo transferensia tuir data ne’ebe iha ona

“Antes ne’e ita anunsiu katak Liga Timorense epoka ne’e hahu iha loron 17 fulan fevereiru 2023 entaun ami halo komunikasaun liu husi enkontru dala rua ho klube sira ne’ebe ami mos fo ona kalendariu ba sira para hatama proposta ba finanseiru suportasaun nian no tuir kalendariu ami sei halo transferensia orsamentu suportasaun finanseiru ba klube sira iha loron 13 to’o 17 fulan fevereiru maibe foin klube AS  Ponta Leste ho Lica Lica Lemorai FC mak hatama proposta”, tenik Frederico

Frederico salienta,  klube barak mak seidauk hatama proposta ba finanseiru suportasaun nian entaun semana oin Federasaun seidauk bele halo transferensia orsamentu ba klube sira entaun husu ba klube sira atu banati tuir konkordansia ne’ebe FFTL, LFTL ho klube sira halo ona  hodi labele prejudika fali atividade ne’ebe planeadu ona tanba transferensia orsamentu ba klube sira tenki hatama proposta to’o 60% husi klube 17 mak foin halo transferensia ba klube sira ne’ebe hatama ona proposta

Iha sorin seluk diretor tekniku Ricardo Mendonça Aitana FC dehan, sira preparadu ona prontu hasoru Porto Taibesi iha jogu abertura divizaun dahuluk Liga Timorense epoka ne’e, sira garante sei manan iha jornada dahuluk.

“Ami preparadu ona, ami nia jogador sira prepara durante semana rua ona ne’ebe ohin dada sorteiu ami mak sei hala’o jogu abertura ba Liga Timorense epoka ne’e iha loron 17 fulan fevereiru tinan ne’e kontra Porto Taibesi FC ne’ebe ami garante sei manan Porto Taibesi tanba ne’e jornada dahuluk maski ami lori jogador Timoroan idade joven deit hamutuk ho senior sira antes ne’e ho tan estranjeiru ida husi nasaun Guinea, ami esperansa Aitana FC mantein nafatin iha divizaun dahuluk Liga Timorense”, Ricardo hateten

Enkuantu iha biban hanesan manajer klube Porto Taibesi Charles Guterres hatete, daudaun ne’e sira jogador sira preparadu ona prontu kontra Aitana FC no minutu 90 mak determina rezultadu iha jogu abertura divizaun dahuluk Liga Timorense epoka 2023

“Daudaun ne’e ami nia klube halo ona preparasaun ba jogador sira maibe jogu kontra Aitana FC iha abertura Liga Timorense epoka iha loron 17 fulan fevereiru tinan 2023 ne’e minutu 90 mak sei determina husi ita nia sorte deit maibe ami otimista sei manan Aitana FC tanba ami iha jogador lokal sira hamutuk ho estranjeiru nain haat husi Indonesia maibe ne’e Timoroan sira ne’ebe moris iha Indonesia”, Charles dehan

Entretantu, klube sira hamutuk 17 mak kompete iha Liga Timorense epoka 2023 husi klube kompete iha divizaun dahuluk hamutuk sia, Academica FC, Aitana FC, Assalam FC, AD SLB Laulara, AS Ponta Leste, Karketu Dili FC, FC Coração/ Atletico Ultramar, Emmanuel FC no Porto Taibesi, divizaun daruak klube ualu maka Santa Cruz FC, AS Marca, Kablaki FC, Nagarjo FC, Zebra FC , Fitun Estudante FC, Lica Lica Lemorai FC no DIT FC, Aitana FC sei kontra Porto Taibesi iha jogu abertura iha loron 17 fulan fevereiru 2023 no divizaun daruak sei abertura husi klube Santa Cruz FC kontra AS Marca  iha loron 23 fulan fevereiru tinan ne’e, kampiaun sei simu 10,000 USD, mellor markador hetan 500 USD, premiu jogu manan sei hetan 70% no lakon hetan husi 30% husi 1000 USD.

Reportajen: Augusto dos Santos