PD Husu Povu Rasionaliza Votu, Determina Futuru Iha ElPar 2023

SAPNewsTL, Dili: Partidu Demokratiku (PD) husu Povu responsabiliza sira nia votu hodi determina futuru nasaun Timor-Leste nian iha Eleisaun Parlamentar (ElPar)  2023  hodi hili partidu ne’ebe iha jestaun diak hakarak dezenvolve rai ida dignifika eroi lutador sira nia kontribusaun ba ukun an rasik an.

“Ami sei la kalkula kadeira hira iha eleisaun parlamentar tinan ne’e iha Parlamentu Nasional maibe ami husu povu liuliu joven sira hamriik determina sira nia futuru no vota partidu ne’ebe iha jestaun diak la’os ida konflitu ne’e no hakarak nasaun ne’e la’o ba oin tan ne’e PD prontu dignifika eroi lutador sira nia kontribusaun tanba rai ida ne’e, povu liuliu  joven sira mak nain no Timor-Leste ba Timoroan hotu”, dehan Prezidente PD Mariano Sabino Assanami ba jornalista SAPNewsTL iha jinajiu desportu Dili, sesta (10/02/2023).

Prezidente ne’e hatutan, partidu iha ona estrutura to’o iha baze ne’ebe kada tinan lima antes tama eleisaun parlamentar sira iha  komprimisiu eleitoral ne’ebe partidu iha hanoin diak ba rai ida ne’e, sira konsidera eleisaun parlementar 2023 ne’e krusial ba Timor-Leste ne’ebe konsolida diak liu tan ba tinan 2027 hodi aselera dezenvolvimentu Timor-Leste nian maibe fila fali ba povu Timor-Leste sira liuliu joven sira nia votu, sira fiar bainhira povu Timor-Leste komesa rasionaliza sira nia votu ne’e determinasaun nasaun nia futuru hodi hametin nasaun ba oin tanba ne’e PD  fiar povu Timor-Leste sei responsabiliza sira nia votu iha eleisaun parlamentar tinan ne’e

Nia informa,  komprimisiu PD iha eleisaun parlamentar 2023 iha buat rua importante mak kria kampu servisu ba juvetude sira hodi bele iha finanseiru rasik hodi kontribui fali ba estadu no estadu labele depende deit ba minarai maibe tenki buka dalan oin seluk oinsa hatama osan ba estadu hodi hasa’e salariu ba traballadór sira hodi muda povu nia moris ida ne’e mak objetivu prinsipal

Entretantu, PD hein katak, tinan ida ne’e povu Timor-Leste bele fo konfiansa ba PD tanba partidu mai ho planu rasik lori Timor-Leste ne’ebe sivilizadu, demokratiku no Timor-Leste forsa liu tan.

Asanami husu, ba apoiantes (kompaneiru sira)  PD nian husi nasional to’o baze hakas an loke dalan para ema hotu apoiu tanba partidu ida ne’e jerasaun foun ka joven sira nian, partidu ba joven sira ne’ebe kampu servisu la iha, ba sira ne’ebe esperansa lakon, ba sira ne’ebe hakarak halo mudansa ba Timor-Leste no ba sira ne’ebe hakarak hatuur nia soberania ba nia povu hotu, mai hamutuk ho PD hakat ba oin.

Reportajen: Augusto dos Santos