Prepara Ba ElPar 2023, Pe. Tiago Husu Sarani Sira Reza & Vota Tuir Konsiénsia

Imajem Intervista Padre Pároku Nossa Senhora Rainha dos Apóstolos de Luro, Pe. Tiago Soares da Costa, iha Igreja Parokia Luro, 2/04/2023.

SAPNewsTL, Lautem: Padre Pároku Nossa Senhora Rainha dos Apóstolos de Luro, Pe. Tiago Soares da Costa husu ba sarani sira atu prepara an no vota tuir konsiénsia nu’udár sarani katólika hodi reza hodi fo determinasaun ba nasaun Timor Leste liu husi eleisaun parlamentar ne’ebé sei mai.

Hafoin remata selebrasaun missa Domingu Ramus iha Parokia Luro, ba jornalista SAPNewsTL Amo Pároku Luro husu ba sarani sira atu reza no prepara an didi’ak hodi partisipa iha kampanha no eleisaun parlamentar 2023 hodi determina futuru nasaun Timor Leste ba tinan lima mai.

“Sarani sira tenke prepara an atu partisipa iha festa demokrasia ida ne’e nu’udar sarani katólika,reza, husu Na’i maromak nia espíritu santu ninia domin, domin intelijente, domin sabedoria, domin naroman ninian atu bele insipra sarani hotu nia fuan ho laran atu vota no hili partidu sira tuir konsiensia ida-idak nian hodi fo vitória ba nasaun Timor Leste para determina futuru nasaun nian”. Dehan Amo Pároku Nossa Senhora Rainha dos Apóstolos de Luro Pe. Tiago ba jornalista SAPNewsTL, hafoin missa Domingu Ramus iha Igreja Parokia Luro, 2/04/2023.

Amo Paroku ne’e hatutan, festa demokrasia ba eleisaun parlamentar ida ne’e konsidera hanesan referemdu daruak wainhira povu sira hili ka fo votus ba partidu sira ho matenek no lolos.

“Eleisaun ida ne’e sai mos hanesan segundu referendum ba Timor Leste, se karik mak povu sira la hanoin, tetu didi’ak, la matenek  atu deside no fo votus ba  ema sesemak atu bele  ou partidu ne’ebé mak bele atu ukun entaun ikus ita mak nafatin de’it no Timor la ba oin, ita sei fahe malu nafatin maibe  fila ba povu tanba ne’e demokrasia”. Tenik nia

Amo paroku ne’e espera  partidu sira sei manan maioria absoluta atu labele fahe ba malu hodi nune’e la’o ho planu ka programa partidu ne’ebé mak iha atu bele lori nasaun ne’e ba oin

“Partidu ida-idak tenke manan maioria absoluta, se kuandu la iha maka  fahe ba malu nafatin, ida-idak sei mantein ninia ideolojia, sira ukun hanesan fahe tarefas ba malu, entaun nafatin la ba oin”. Nia subliña

Enkuantu, Nia mos husu ba povu no sarani sira atu reza husu Na’i maromak atu bele loke Timor oan tomak nia hanoin maske inklina ba partidu ida mas se espiritu santu haruka tuir ida ne’ebe, prontu husik  nia an no la’o tuir atu determina futuru nasaun nian.

Jornalista: Luis Pailofo