Programa IX Guvernu Foka Ba Prosperidade & Kombate Korrupsaun
SAPNewsTL, Dili : Liu husi Reuniaun Konsellu Ministru Ohin iha Palásiu Governu Dili, aprova ona Programa Governu Konstitusionál IX. Programa ne’e sintetiza polítikas públikas prinsipáis ne’ebé atu adota durante Governu ninia mandatu.
Objetivu mak atu hametin no otimiza setóres governasaun nian no sira nia rekursu, hodi habadak dalan atu transforma vizaun Ajenda Dezenvolvimentu Sustentavel 2030 nian no Planu Estratéjiku Dezenvolvimentu 2011 – 2030 nian hodi sai realidade.
“Konsellu Ministrus delibera ona no mós sei aprezenta ba Parlamentu Nasionál Votu Konfiansa ida ba Governu, ne’ebé fundamenta husi komprimisiu ne’ebé firme no determinadu Governu atu implementa ninia Programa, ho objetivu atu promove dezenvolvimentu, prosperidade no moris diak ba sidadaun Timor Oan,”Dehan Presidensia Konsellu Ministru Agio Pereira iha Salaun Palasiu do Governu kuarta feira 12/07/2023
Programa ne’e kompoin husi área prinsipál neen, hanesan afirma filafali Estadu Direitu Demokrátiku, dezenvolvimentu kapitál sosiál, dezenvolvimentu infraestruturas, dezenvolvimentu ekonomia, konsolidasaun governativa, boa governasaun no kombate hasoru korrupsaun.
Reportazen : Lidia Amaral & Conzita Mota