Promesa Sai Realidade, Joãojinho : TL Marka Jornada Foun Iha Asean Para Games 2022
SAPNewsTL, Dili: Atleta Paralimpiku kontente lori medalla 12 osan mean lima, osan mutin husi atleta modalidade Para Atletizmu, Tenis Meza no Hiit Besi hafoin partisipa Asean Para Games 2022 ne’ebé realiza iha Solo Indonésia, Atleta sira fo agradese no orgullu ho ne’ebe hetan resultadu husi eventu ida ne’e
“Ha’u kontente los bele lori medalla osan mean rua no metan ida mai Timor Leste maski ita nia nasaun kiik oan, ema hotu fo agradese tanba ami joga mos nasaun bo’ot sira ne’ebé ha’u nia rezultadu ne’e espesialmente ba Timoroan hotu tanba ami ba la’os lori an rasik ne’ebé ami manan Timor oan hotu manan”. Dehan atleta modalidade para tenis meza Pascoela dos Santos Pereira ba jornalista sira iha edifisiu SEJD Lecidere, Díli, Segunda-Feira, 8/08/2022
Iha sorin seluk atleta modalidade para atletizmu Teófilo Freitas hatete, rezultadu hetan medalla osan mean tolu halo nia sente kontente tanba buat ne’ebe nia promote ba Komite Paralimpiku sai realidade.
“Liu husi rezultadu medalla osan mean tolu ne’e ha’u sente kontente tanba buat ne’ebé ha’u promete realiza duni tanba antes ne’e ha’u hasoru dezafiu iha rai laran ne’ebé kansela ha’u labele ba kompete maibé ha’u nia treinador no klube esforsu no promete ba komite Paralimpiku katak ha’u sei hatudu prestasaun ne’ebé ha’u ba kompete duni no iha rezultadu duni hatudu ba komite Olimpiku”. Teófilo hateten
Iha fatin hanesan atleta modalidade António José Aniceto Serão informa, nia sente kontente ba rezultadu hetan medalla osan metan ida maski iha limitasaun barak iha Timor Leste.
“Ha’u sente kontente ba rezultadu ne’e maski ba kompete ho limitasaun orsamentu no problema barak no kompete ho nasaun dezenvolvidu sira maibé governu nafatin apoiu ba kompete iha eventu Asean Para Games, ne’ebé ami sente orgullu ba SEJD ne’ebé kria ona preparasaun mai ami iha fulan tolu ho buat ne’ebé sufisiente, ami husi modalidade tolu ne’e hetan rezultadu di’ak hotu”. Antonio teni
Iha biban hanesan treinador para Tenis Meza Mario F. Ximenes afirma, nu’udár ofisial, treinador no federasaun sente kontente tanba atleta sira hatudu prestasaun di’ak no agradese ba SEJD no CPNTL.
“Ami nu’udár ofisial, treinador no federasaun sente kontente tanba atleta sira bele hatudu prestasaun iha Asean Para Games 2022 iha Solo, Indonesia tanba ba la’os partisipa maibé kompete no ami mos la haluha ami nia agradesementu ba SEJD no CPNTL ne’ebé durante ne’e suporta hahú husi preparasaun to’o ohin loron ne’ebé ita hetan rezultadu di’ak maski iha Timor Leste hetan problema barak ba fasilidade no ami nafatin husu apoiu husi CPNTL no SEJD apoiu nafatin para ba oin bele di’ak liu tan”. Tenik Mário
Entretantu Sekretariu Estadu Juventude no Desportu Abrão Saldanha kontente tebes tanba istoria ba dahuluk nia simu atleta defisiente sira hetan medalla 12 ne’ebé bele inspira Timor oan hotu atu nune’e labele husik ida iha kotuk maibé fo oportunidade ba ema hotu hanesan
“Ha’u kontente tebes tanba istoria ba dahuluk ohin loron ha’u simu atleta defisiente lori medalla 12 hafoin kompete iha Asean Para Games no orgullu tan prestasaun husi atleta defisiensia ne’e hatudu katak bainhira ita kuiñese no fo espasu ba atleta defisiensia sira nia poténsia sira sei hatudu prestasaun ne’ebé sei inspira ema la defisiensia ne’ebé mos governu investe di’ak liu ema defisiente sira no espesial ba maluk defisiente sira iha munisipiu sira ne’ebé husik hela “. Abrão Salienta
Iha fatin ne’e xefi komisaun Joãojinho F. da Conceição hatutan, Timor Leste halo tan istoria iha Asean Para Games iha Solo, Indonesia tanba Timor-Leste ba kompete hatudu rezultadu di’ak hetan medalla 12.
“Ami halo despedida ho SEJD no Primeiru Ministru katak ba la’os partisipa maibé kompete ne’ebé iha multi eventu ida ne’e atleta sira fo nia forsa katak Timor Leste sei hetan rezultadu ne’ebé mak di’ak no medalla ne’ebé konskista husi ita nia atleta Teófilo Freitas, Domingos da Costa no Domingos Lobato Pereira husi modalidade Para Atletizmu hetan medalla osan mean tolu no osan mutin rua no ita nia atleta Abelita Borges, Pascoela dos Santos, Bernardo husi Para Tenis Meza hetan medalla osan mean rua no osan metan haat no modalidade, ita nia atleta António José Aniceto Serão husi Hit Besi hetan osan metan ida”. Joãojinho Subliña.
Reporter : Augusto dos Santos
Editor : Luis Pailofo