PSHT-IKS Bandu Membru Utiliza Uniforme Organizasaun Partisipa Atividade Politika
Imajen: Prezidente IKS PTL Silvestre Xavier Sufa
SAPNewsTL, Dili: Hafoin sorumutu ho Sekretariu Estadu Juventude no Desportu iha Salaun Magna Lesidere Dili, Lider Organizasaun Persaudaraan Setia Hati (PSHT) no Ikatan Kera Sakti (IKS) haktuir bandu membru sira utiliza partisipa kualker atividade politika ruma liuliu kampania eleisaun parlamentar 2023 nian.
“Agora ita besik eleisaun ona nu’udar organizasaun arte marsial, IKS PTL bandu membru sira labele uza uniforme IKS nia iha asaun politiku ruma liuliu mak iha kampania eleisaun parlamentar 2023 nian hodi labele fo impaktu ba organizasaun, IKS PTL fo dixiplina ba membru sira ne’ebe ema labele tama organizasaun hodi lori tuir pesoal nia hakarak maibe tuir prinsipiu ka orientasaun organizasaun nian karik lakoi bele sai husi organizasaun atu nune’e labele estraga organizasaun tanba atu sai kualidade IKS buka dixiplina laos ema”, dehan Prezidente IKS PTL Silvestre Xavier Sufa ba jornalista sira iha edifísiu SEJD Lecidere, Dili segunda 30/01/2023
Prezidente hatutan, antes tama ba kampania IKS PTL sei avizu liu husi media no eskrita katak bandu membru uza atributu organizasaun tuir kampania eleisaun parlamentar atu nune’e kria estabilidade iha kampania no hadok an husi risku ne’ebe afeta ba organizasaun nian, bainhira membru sira utiliza atributu organizasaun nian PNTL iha direitu para kaer sira tanba lei numeru 5 la fo dalan ne’ebe katak labele uza uniforme iha fatin publiku eseptu atividade organizasaun nian.
Imajen: Prezidente PSHT Baltazar Lemos
Iha fatin hanesan Prezidente PSHT Baltazar Lemos hatete,membru sira labele utiliza uniforme organizasaun iha kampania eleisaun parlamentar 2023
“Ami nia membru sira labele utiliza atributu arte marsial iha kampania eleisaun parlamentar 2023 tenki uza farda normal ka sivil, bainhira ami nia membru sira utiliza uniforme organizasaun PSHT seguransa sira bele atende nia”, tenik Baltazar
Reportajen: Augusto dos Santos