Enkontru Ho Organizasaun 18, SEJD-KRAM Sosializa Fundu Millaun 2,5

SAPNewsTL, Dili: Sekretariu Estadu Juventude Desportu (SEJD) ho Komisaun Regulador Arte Marsial (KRAM) enkontru ho organizasaun arte marsial 17 ho Federasaun Silat Timor-Leste (FESTIL) hodi sosializa orsamentu dollar amerikanu millaun 2,5 ne’ebe governu apoiu ba dezenvolvimentu organizasaun nian.

“Enkontru ohin ne’e ho objetivu atu sosializa apoiu fundu ba dezenvolvimentu organizasaun arte marsial ho montante dollar amerikanu millaun 2,5 fahe ba komponente lima maka apoiu jestaun ba organizasaun, resensiamentu membru sira, formasaun ba treinador sira, kompetisaun internal kada organizasaun no harii sede ba organizasaun sira”, Dehan prezidente KRAM Fernando da Costa ba jornalista sira iha edifísiu SEJD Lecidere, Dili, segunda (30/01/2023).

Prezidente hatutan, organizasaun arte marsial hamutuk 18 inklui FESTIL maka sei hetan apoiu husi governu ne’e, organizasaun sira ne’e balun iha federasaun rasik maka Boxing, Taekwondo ho seluk tan no organizasaun neen PSHT, IKS PTL, Padjadjaran, Seruling Dewata no Perisai Diri mak  hamahan iha FESTIL,  organizasaun 18 ne’e sei hetan orsamentu bazeia ba membru organizasaun nian ne’ebe organizasaun membru oituan liu mak organizasaun Aikido no barak liu mak PSHT, IKS PTL no KORK ne’ebe organizasaun PSHT, IKS PTL ho KORK sei hetan orsamentu montante dollar amerikanu rihun atus tolu resin no Aikido sei simu dollar amerikanu rihun neenulu resin.

Iha fatin hanesan Prezidente IKS PTL Silvestre Xavier Sufa hatete, orsamentu governu apoiu ba sira fundu ba dezenvolvimentu organizasaun nian maibe nia sujere orsamentu ne’e SEJD mak organiza deit

“Orsamentu ne’ebe governu preve ba ami nia organizasaun ne’e fundu ba apoiu dezenvolvimentu organizasaun nian ne’ebe ba harii sede ne’e, ami nia organizasaun iha ona rai no konstrusaun balun ne’ebe ami sei hatama nia dezenu deit ba SEJD, orsamentu ba apoiu dezenvolvimentu ne’e ha’u sujere diak liu SEJD deit mak ezekuta para relatoriu sentral labele fo ba ami nia organizasaun tanba selae ami nia responsabilidade menus ikus ami ba hatan iha tribunal, fo deit orsamentu ba administrasaun nian no resensiamentu ba membru la’o ona la kleur bele remata ona membru provizoriu ema nain-25,000”, tenik Silvestre

Iha sorin seluk Prezidente PSHT Baltazar Lemos dehan, sira prontu simu fundu apoiu dezenvolvimentu organizasaun nian hodi jere sira nia organizasaun iha Timor-Leste

“Fundu apoiu dezenvolvimentu organizasaun nian ne’e governu iha inisiativa atu ajuda organizasaun arte marsial sira, ida ne’e ami prontu simu maibe ami sei jere ami nia organizasaun iha Timor-Leste”, Baltazar afirma

Baltazar akresenta, sira nia resensiamentu ba membru lao hela ne’ebe agora labele fo sai membru hira selae  ema hotu inklui governu duvida tanba seidauk to’o final ne’ebe to’o final mak hasai rezultadu para publiku hotu hatene.

Entretantu, Organizasaun arte marsial ne’ebe rejistradu iha KRAM maka IKS PTL, PSHT, KORK, Padjadjaran, Seruling Dewata, Sinar Putih, Perisai Diri, Aikido, Wushu, Shorinji Kempo, Judo, Karate-Do, Boxe Amadora, Muay- Thay, Taekwondo, THS-THM, Kolimau 2000.

Reportajen: Augusto dos Santos