PST Hari’i Sentru Akita Tama-Laka, Avelino : Povu Terus Deputadu Sira Di’ak Hela

SAPNewsTL, Dili : Partidu Sosialista de Timor (PST) liu husi Departamentu Orientasaun Polítika ideolójika realiza komferénsia no Debate ho tema ideolojia orienta ba asaun no asaun ba liberta feto no mane,iha intervista Prezidente PST Avelino Maria Coelho da Silva hateten objektivu husi komferénsia ne’e atu hari’i sentru formasaun polítika ideolójika Akita Tama-Laka hodi loke formasaun debate ba joven sira

“Aktividade ohin loron nian, iha ambitu partidu hari’i Sentru Formasaun Politika Ideológiku Akita Tama-Laka, sentru formasaun ne’e la halo formasaun aula maibe halo formasaun debate, ita ko’alia halo perguntas para orienta ona ita nia pensamentu polítiku ideolojiku”. Tenik Prezidente PST Avelino Maria Coelho da Silva iha Salaun CNE, 13/08/2022

Nia akresenta, sentru formasaun ne’ebe loke tau prioridade ba joven sira tanba joven mak nu’udar fonte ba informasaun hodi bele liberta povu no nasaun

“Joven mak sentru informasaun, joven mak asesu ba teknolojia, joven mak iha ona kunesimentu atu muda perspektiva entaun komferénsia ohin loron nian ne’e oinsa atu debate kona-ba partidu nia hanoin no joven sira nia hanoin, uluk ita joven  iha espiritu liberta rain, agora oinsa mak ita fo fali enerjia ne’e ba joven sira atu liberta povu, liberta povu tenke iha kunesimentu sientifiku, hatene lei dezenvolvimentu sosial para bele muda nasaun ida”. Hateten nia

Iha parte seluk, Prezidente Partidu Sosialista de Timor ne’e hateten impase politiku ne’e halo povu terus tanba iha konstituisaun artigu balun ladun di’ak permite ema interpreta

“Konstituisaun ne’e bele muda bainhira iha maioria parlamentar, iha dois terçu materia balun bele muda, polítika referendum ne’e parlamentu mak halo, iha impase politiku ne’e halo povu terus, deputadu sira di’ak tanba sira servisu nafatin impase ne’e impaktu ba sidadaun,  impase politika ne’e iha konstituisaun artigu balun ladun di’ak permite ema interpreta entaun hadia konstituisaun”. Dehan nia

Prezidente PST ne’e haktuir atu muda nasaun ida tenke rona ema hotu nia hanoin hodi muda politika no lei

“Atu muda nasaun ida ne’e, ita presiza rona ema hotu-hotu entaun presiza orienta ona ema hotu-hotu nia hanoin katak situasaun sira ne’e bele muda bainhira muda politika, muda lei, se mak bele muda politika sira ne’e tenke ema ne’ebe mak iha kunesimentu mai ho vizaun ideolójiku entaun PST nia obrigasaun ne’e nu’udar partidu la liu bareira maibe oinsa partidu kria mekanismu atu sensibiliza joven sira”. Nia hakotu

Jornalista  : Marcela Mesquita Lemos & Marcela Merry da Costa

Editor        : Ekipa Editorial