Komunidade Fatubessi Loke Torneiu Komemora Loron Falintil, Desportu Labele Sentraliza Deit Iha Nasionál
SAPNewsTL, Ermera : Atu Komemora Loron Falintil ba dala XLVII, komunidade Fatubessi realiza atividade desportiva liu husi jogu futebol, Objetivu husi jogu ne’e atu halakon diskriminasaun hodi hametin paz no unidade ba juventude sira iha Suku Fatubessi.
Tuir Presidente Komisaun organizadora Domingos Martins liu husi nia intrevista hateten aktividade ne’e loke abertura iha dia 23 fulan jullu 2022, kontenti tebes tanba maske mosu desintendementu iha kampu laran maibe sira iha nafatin unidade no fiar malu
“Komisaun organizadora hala’o aktividade iha municipiu dili mai too iha munisipiu Ermera Postu Hatulia B Suku Fatubessi hodi komemora loron falintil, difikuldade barak mak ita hasoru hanesan joven ita labele sura no ita prontu atu hasoru nu’udar preparasaun ida ba futuru, objetivu ne’ebe ita iha oinsa mak atu bele organiza ita nia maluk joven sira iha suku laran atu nune’e labele kria konflitu”. Dehan nia ba Jornalista sira iha Munisipiu Ermera, 12/08/2022
Nia hatutan, atividade ne’e organiza husi organizasaun oioin iha Dili no hetan apoiu husi Sekretaria Estadu Juventude no desportu
“Ami servisu hamutuk mak bele organiza torneiu ne’e ho diak, maske Klibur Estudante Juventude Fatubessi(KEJF) mak organiza maibe servisu hamutuk ho organizasaun sira hanesan MEJ 1912 Manufahi, KEJF, FKTL, no KEFA, atividade ne’e mos hetan apoiu husi Sekretaria Estadu Juventude no Desportu (SEJD)”. Nia Informa
Iha fatin hanesan seksaun desportu Jose Pereira hateten jogu ne’e hetan partisipasaun husi klube sia (9) ne’ebe konsege registradu hodi partisipa iha torneiu ne’e ho montante $10 dolares
“Ami nia abertura ba torneiu ne’e iha semana rua liu ba, iha ne’eba iha klubo sia (9) depois de jogu abertura, ikus ida deit maka sai, klubu walu seluk hakat ba tama iha oitavu final, prosesu ne’e la’o nafatin husi klube haat derota konsege klubu haat seluk hakat ba kuatro finais no ohin finaliza ba aktividade torneiu ba 20 de Agostu nian ne’ebe Klubu Kuda Bula mak mak sai vensedor”. Dehan nia
Entretantu, nia realsa kondisaun kampu ne’ebe ladun diak maibe la lakon vontade atu promove no desenvolve sira nia talentu hodi halakon diskrimisaun sira iha sosiedade
“Iha talentu ne’ebe barak kona-ba area desportu, ami la haree ba ami nia kondisaun kampu ne’ebe aat maibe hatudu katak ami joven husi area rural sira mos iha talentu kona-ba area desportu nian, ami nafatin hakarak akumula juventude sira konhese malu hodi halakon tiha diskriminasaun entre joven ida ba joven seluk”. hateten nia.
Joven ne’e mos husu ba joven sira iha suku fatubessi, hanesan foho oan lalika lakon talentu ne’ebe maka iha, nafatin hatudu katak iha foho mos iha talentu
Nia mos husu ba Sekretariu Estadu Juventude no Desportu atu labele konsenta deit iha nasionál maibe tau atensaun mos iha area rural
“Rekomenda Ba Sekretariu Estadu Juventude no Desportu labele haree deit aktividade desportu iha nasional to’o munisipiu maibe mos haree mos iha area rural sira tanba juventude sira barak iha area rural barak iha talentu kona-ba desportu,” tenik nia.
Enkuantu, programa ne’e hetan suporta husi Sekretariu Estadu Juventude no Desportu no komunidade Hatulia Oan sira, portantu, Atividade ne’e hetan partsipasaun maksimu husi komunidade no juventude sira iha Postu Administrativu Hatulia B Suku Fatubessi, iha ne’ebe Klube kuda Bula sai primeiru lugar, klube Pregrinho Unidos sai segundu lugar no klube Unjoma sai terseiru lugar
Reporter : Ekipa Kobertura
Editor : Luis Pailofo