RAEOA Triste, Tais 317 La Ba Dubai, CI-MTCI Devolve Hikas Ba Na’in

SAPNewsTL, Dili : Deputada Bankada Congresso Nasional de Reconstrução Timor Lúcia Taeki Senti Triste no kestiona responsabilidade guvernu nian kona-ba CI no MTCI ne’ebe intrega fila fali Tais 317 ba soru tais na’in sira

Deputada ne’e dehan, antes ne’e CI no MTCI koordena ho Tia sira iha Oe-Cusse, liu-liu sira soru tais na’in hodi tais ne’e 317 tais ki’ik no tais boot, kuaze tinan ida ona tais ne’e la ba Dubai tau hela iha container laran.

Nia dehan, inan sira ne’e hanoin hela dehan sira-nia tais ne’e ba ona iha Dubai sira sei simu osan, maibé realidade semana kotuk tia sira husi Oe-Cusse para atu mai simu osan maibe la simu osan simu fali sira-nia tais, ida ne’e kestionavél tebes.

“Governu la iha responsabilidade, se kuandu Tais ne’e la fa’an pelu menus iha tinan kotuk fulan ida ka fulan rua kontaktu fali ba tia sira para foti fali sira-nia tais la’ós budu to’o tinan ida tau iha container, bainhira tia sira mai husi Oe-Cusse ba hasoru komisaun organizadora Expo Dubai foti fali tais ne’e, oinsá ita boot sira-nia hanoin kuitadu, tanba saida mak Ha’u ko’alia hanesan ne’e, tanba tia sira empresta osan atu halo tais ne’e i osan na’in foti fali sira-nia rai, sira hela, balu sira-nia animál tanba la iha osan atu fó fila ema-nia osan”. Tenik Deputada Lucia Taeki iha nia intervensaun, iha PN, Dili, 12/07/2022

Nia hatutan, situasaun Oe-Cusse la hanesan ho munisípiu sanulu-resin-rua (12), transporte araska dala ruma hakilar tun sa’e ba ró, sira tenke buka osan selu ró husi Oe-Cusse mai to’o Dili, ne’ebe husu ba Sr. Ministru ko’alia netik ho ministériu relavante kona-bá ida ne’e

“Agora tia sira  foti fali tais ne’e iha sira-nia liman ona, tanba saida mak halo Oe-Cusse sai hanesan ne’e kuitadu, sira buka osan para sustenta sira-nia família i liu-liu atu fó eskola ba sira-nia oan, sira-nia moris mak hodi tais ne’e nusa mak ita halo fali hanesan ne’e, ne’ebé husu ba kolega deputadu 65 atu sosa fali tais ne’e atu nune’e tia sira fila ba Oe-Cusse bele selu netik ró”. Nia dehan

Iha parte seluk koordenadora grupo Tais María Tapo mos akresenta, sira senté triste tanba produto ne’ebe mak sira halo la Lori ba promove iha Dubai maibe butuk deit iha kontainer laran

“Tempu ne’eba CI mak ko’alia atu ba promove depois fa’an, to’o tempu mai Fali mak produtu sira ne’e la lori ba promove iha Expo Dubai maibe haruka fali ami hodi ba foti fila fali ami nia sasan sira , Ami senté triste tanba produto sira ne’e la ba to’o iha Dubai, depois hetan kontaktu de’it dehan mai Foti fila Fali”. Tenik nia

Enkuantu tais hirak ne’e ho folin tuir ninia modelu iha 25, 40, 60, 75, 100, 120, 200, ne’ebe sira produz ho kosar-ween maibe ikus mai guvernu devolve hikas sira nia Tais

“Ami triste Governu nusa mak halo Povu terus hanesan ne’e, Ami terus teb-tebes maibe ami hatene katak Governu ne’e la bosok Povu, se dehan fa’an di’ak ami fa’an iha ami nia viziñu, problema ne’e Ami hasoru iha tinan kotuk 12-07-2021 ohin kompleta tinan ida,”  hakotu nia

Jornalista  :  Lidia Amaral & Eduardo Moniz