Selebra Aniversáriu ASEAN, PM Husu Povu Prepara Ba Dezenvolvimentu Rejional
SAPNewsTL, DILI- Hafoin Primeiru Ministru(PM) Jose Alexandre Kayrala Xanana Gusmão, partisipa Festeza Aniversáriu Assosiação das Nacoes dos Sudeste Asiatico (sigla Português ASEAN) ba Dala-56 iha Embaixada Filipina, PM Xanana haktuir dadaun ne’e Timor-Leste prepara hela ba ASEAN tanba ne’e PM husu hotu-hotu tenke servisu didiak para partisipa iha Dezenvolvimentu regiaun.
“Presidente da Republika hatudu ona mai ita katak nia hatene historia ASEAN nian. Ha’u sente kontente foin primeira ves ha’u mai, sira halo dala hitu(7) ona tinan-tinan. ita prepara ann hela atu tama ba ASEAN, ne’e duni husu ita hotu servisu didiak hodi bainhira sai membru ASEAN ita mos partisipa dezenvolvimentu iha regiaun” Dehan Primeiru Ministru, Jose Alexandre Kairala Xanana Gusmão, ba Jornalista sira iha embaixada Filipina,Sexta-feira(11/08/2023)
Primeiru Ministru ne’e hatutan, “Husi Timor-Leste, ha’u hato’o ami-nia felicitações ba ASEAN, tanba iha tinan 56 laran halo promosaun ba estabilidade, unidade no paz iha regiaun.”Primeiru Ministru hateten
Nia informa, ASEAN promove daudaun ona dezenvolvimentu no prosperidade ba povu hotu iha região ne’e ho diversidade kultural, histórika no religiosa ne’ebé boot tebe-tebes, ASEAN hari’i ona komunidade ida ne’ebé nakonu ho respeitu no tolerânsia.
Xanana Gusmão konsidera ASEAN hanesan potênsia ekonómika dinâmika ida ne’ebé hateke ba futuru ho otimismu.
Timor Leste nu’udar Nasaun foun ne’ebe sei iha prosesu konstrusaun estadu direitu no demokrátiku hodi luta ba dezenvolvimentu sustentável
“Liu tiha tinan 24 luta ba independênsia no tinan 21 hasoru luta foun, agora ne’e ba construsaun ami-nia Estadu demokrátiku ho fundações nu’udar nação desenvolvida no sustentável”.
“Timor-Leste kontinua buka hatene lolos prinsípiu sira ne’ebé orienta ASEAN iha transformasaun Sudeste Asiático hanesan komunidade nações ida ne’ebé iha konfiansa, amizade ho kooperasaun mak hanesan valores ne’ebé halibur hamutuk nasaun sira ne’ebé la hanesan”.informa nia
Primeiru Ministru hatutan katak “Timor-Leste hanesan membro-fundador organização intergovernamental ida ne’ebé temi naran “G7+”, ho estatuto hanesan Observador Permanente iha Organização das Nações Unidas, luta maka’as ba paz no ba desenvolvimentu, maibé liuliu ba konstrusaun Estado demokrátiku sira ne’ebé respeita Direitos Humanos ho Demokracia”
“Ne’e mak objetivu prinsipal ne’ebé hamutuk ho 19 Estados-membros, Timor-Leste buka atu atingi no, felizmente, ami prova ba mundo katak Timor-Leste iha ona dalan ne’ebé loos, hanesan bele haree liuhusi ami-nia partisipasaun pasífika no demokrátika iha ami-nia eleições Presidenciais ho Parlamentares foin daudaun ne’e” saleinta nia
Governante ne’e fo felisitasaun ba ASEAN no dejeza ASEAN ne’ebe forte iha respeitu ba direitu ema nian, liberdade no demokrasia
“Ha’u hatene katak, ami mós bele hasoru dejafiu sira ne’ebé iha ami-nia oin, aproveita oportunidade boot sira ne’ebé região ne’e bele oferese mai ami. permite ha’u felisita ASEAN no deseja susesu tomak iha construsaun ASEAN ida ne’ebé forte liután, ho respeitu ba Direitos Humanos no Liberdades Democráticas”. Nia subliña
Iha Aniversáriu ASEAN ba dala 56 ne’ebe realiza iha Embaixada Filipina ne’e Partisipa mos husi Presidente Repúblika José Ramos Horta, Vise Primeiru Ministru Francisco Kalbuadi Lay, Embaixador Sira no Konvidadus Sira
Jornalista : Marcela Mery da Costa