Selebra Aniversáriu ! MOFA Promete Harahun Injustisa & Dezigualidade Iha Timor
SAPNewsTL, Ermera – Organizasaun, Movimentu Foinsa’e Atsabe (MOFA), ne’ebe moris ho konsiensia revolusionáriu ba konstrusaun sosiedade solitáriu, iguál, justu no inklusivu, festeza aniversáriu ba dala rua (2) iha Postu Administrativu Atsabe, Municipio Ermera
Presidente MOFA Igitro dos Santos haktuir MOFA moris hanesan konsekuensia ida husi sistema ohin loron, ne’ebé dezigual no injustu ne’ebe fó espasu ba grupu mínoria (Borjuista) hodi esplora no esploita grupu maíoria povu maubere (Proletariadu) iha sosiedade ida ohin loron.
“Movimentu foin-sa’e Atsabe-oan konsiente katak, prosesu luta ida naruk no todan ne’ebé ohin loron ita nia sosiedade hasoru iha era-independensia mak sistema kapitalismu ne’ebé hahoris elite sira esplora no esploita hasoru povu maubere ida ne’e. Ho tempu hanesan kapitalismu globál pratika asaun dez-umanu hasoru umanidade iha mundu tomak, tamba ne’e loron hat (4) fulan janeiru tinan 2022 MOFA hahu moris hanesan movimentu indepedente ida hodi hola pozisaun hanesan povu maubere”. Tenik Presidente MOFA Igitro dos Santos iha Atsabe, 04/01/2023
Atsabe-oan sira reafirama katak, husi kauza prinsipál ne’ebe MOFA mensiona bazeia ba pratika ne’ebe moris iha sosiedade Timor nia matan ho nune’e, Mofa moris nu’udar obra koletiva foinsa’e Atsabe-oan sira nian, no hola nia pozisaun nu’udar povu maubere (Proletariadu) ka klase dominante hodi organiza, mobiliza no konsentiza foinsa’e Atsabe-oan tomak.
“Tan ne’e MOFA hamrik ho vizaun ne’ebé hatu’ur iha artigu 6⁰ estatutu Mofa nian ‘Hakarak hahoris foinsa’e ida ho konsensia revolusionáriu ba konstrusaun sosiedade ida solitariu, iguál, justu no inklusivu”.Lider Juvenil ne’e Sublinha
Iha sorin seluk tuir filozófia materialismu (Marxismu) haktuir buat hotu ne’ebé eziste iha mundu konkretu ida ne’e nu’udar materia ida no materia ne’e rasik sempre iha kondisaun bok-an (Mudansa) tuir tempu, espasu no fatin.
“Mak ho fiar-metin no esperansa tomak Mofa sei luku no luku ho kle’an liu tan hamutuk ho foinsa’e, estudante, traballiadór, kampuneza ki’ak sidade nsst. Hanesan forsa materiál ba Mofa hodi destrói sosiedade ida ohin loron, ne’ebé dezumanu, injustu no deziguál hodi hari’i sosiedade ida tuir vizaun Mofa nian. No vizaun ne’e sei to’o!”Nia afirma
Ohin loron hat (4) fulan janeiru tinan 2024, tinan-rua ona Mofa iha ezistensia, hamutuk ho feto no mane (Foinsa’e) hirak ne’ebé nafatin firme iha fileira rezistensia hodi luta no nafatin luta ba povu ki’ik no ki’ak sira nia interese.
“Rezistensia ne’e atu forte liu-tan mak husu Atsabe-oan sira mai halibur hamutuk iha Mofa hanesan espasu alternativa ba mudansa no espasu ne’e ba Atsabe-oan tomak tanba” Mofa mak foinsa’e Atsabe no foinsa’e Atsabe mak Mofa” hodi luta to’o vitoria finál (sem exploração do sistema pelo homem e sem exploração do homem pelo homem)”.Nia dehan
Movimentu foinsa’e Atsabe (Mofa) parabeniza no enkoraza foinsa’e Atsabe-oan sira-hotu, firme no kontinua luta ba moris di’ak Atsabe-nian no ema hotu nian tuir misaun sagradu ne’e Mofa estabelese ona hodi atinji vitoria finál ne’ebe mofa luta
Enkuantu, Movimentu Foinsa’e Atsabe hato’o nia agradesementu ba parte hotu-hotu individuál ka grupu ne’ebé fó ona sira nia kontribuisaun ideia no materiál iha ezistensia Mofa nian durante tinan-tolu. Mofa agradese ba inan-aman sira hotu ne’ebé fó ona sira nia-oan feto no mane mai hamutuk ho Mofa iha luta sagradu ida ne’e. Ba imi nia kolen Mofa sei selu ho vitoria povu maubere nian.
Enkuantu, Organizasaun juvenil MOFA hari’i husi foinsa’e estudante Atsabe oan sira iha loron 04 fulan Janeiru Tinan 2022, tinan ne’e organizasaun refere selebra ona nia aniversáriu ba dala II iha Postu Atsabe Munisipiu Ermera.
Jornalista : Conzita Mota