Selebra Aniversáriu PD Ba Dala XXII, Assanami Konsidera Jerasaun Maubere Prontu & Forte Ona

SAPNewsTL, Dili : Iha ámbitu Selebrasaun Aniversáriu Partidu Demokrátiku (PD) ba dala XXII, Iha Diskursu Presidente PD Mariano Assanami Sabino haktuir PD Hamriik ho Maun Boot Kayrala Xanana Gusmão hodi apoia nu’udar Primeiru Ministru hodi servi povu no nasaun

“Parabens Ba Povu Tomak, Deskulpa tanba Partidu ida ne’e Seidauk halo buat barak, Maibé Sei Kontinua Esforsu hodi kontinua Mehi Lutador sira nian, Ohin Hamriik ho Maun Kayrala Xanana Gusmão hodi fo apoiu nu’udar Primeiru Ministru atu servi no luta ba povu ida ne’e”. Tenik Presidente PD Mariano Assanami Sabino, Liu husi Diskursu, Dili, 10/06/2023

Assanami hatutan, Jerasaun Maubere Prontu Nafatin hodi Servi Povu no Nasaun Timor Leste

“Maun Xanana ohin la Konsege Mai, Maun Mari, Lu Olo, Lere no Taur Laiha ne’e, Ami iha ne’e, ami konta nafatin imi iha ne’e, Ami Imi nia jerasaun, jerasaun Maubere oan ne’ebe prontu atu servi nafatin rai ne’e ba oin, ami husu deskulpa karik liafuan ruma Soke iha tempu Kampanha, hakruk ba imi, imi nia Apoiu Tomak ba PD”.

“Ohin 22 anos, imi nia oan sira forte daudaun Ona, Forma uma Kain, Ami imi nia Jerasaun Maubere iha ne’e atu fo kontinuidade, hakuak boot ba Partidu hotu hotu, ita hotu sei nafatin hamutuk Hela, Timor Oan hotu hotu tenki iha espasu hodi desenvolve ita nia Rai ba oin”. sublinha Assanami

Entretantu, Presidente PD ne’e fundamenta CNRT no PD sei implementa Planu Estratéjiku Dezenvolvimentu Nasionàl Liliu Pipeline no Kadoras Greater Sunrise mai Timor Leste, Dezenvolve ZEEMS no hadia infraestrutura RAEOA no kria Kampu Servisu ba joven sira

Iha Fatin Hánesan, Sekretariu Jeral Partidu CNRT Francisco Kalbuadi Lay mos hato’o Parabéns ba Partidu Demokrátiku ne’ebé halo Aniversáriu ba dala XXII

“Lori Maun Boot, Presidente Partidu CNRT Kayrala Xanana Gusmão nia Naran, hato’o Parabéns ba Partidu Demokrátiku, hamutuk ita kontinua Servi Povu ida ne’e, CNRT Mak PD no PD mak CNRT”. Dehan Sekretariu Jeral Partidu CNRT Francisco Kalbuadi Lay

Sekretariu Jeral Partidu Demokrátiku Antonio da Conceição Kalohan mos hato’o parabéns ba povu Timor Leste ne’ebe nafatin fo konfiansa ba PD hodi kontinua eziste to’o tinan 22

“Ohin PD halo Aniversáriu halo tinan 22, marka Istória ba PD ne’ebe lori PD ba Ambiente foun atu tabik iha Guvernasaun ne’ebé sei forma iha Nonu Guvernu hodi lori mudansa ba Timor Leste, Parabéns ba imi hotu tanba imi hotu nia Apoiu mak partidu ida ne’e Hamriik To’o 22 anos”. Hatete Kalohan

Enkuantu, Partisipa iha Aniversáriu maka Presidente Repúblika José Ramos Hort, Sekretariu Jeral Partidu CNRT Francisco Kalbuadi Lay, II Vise Presidente CNRT Gil Oan Soru hamutuk ho Kuadrus, militantes no Simpatizantes PD

Jornalista: Lídia Amaral