Somotxo Rekunhese Luis Lobato Mak Inisia Luta Ba Mudansa Lideransa Iha FRETILIN
SAPNewsTL, Dili : Hafoin Presta Omenajem ikus ba Saudozu Luis Lobato iha nia Rezidensia Delta Nova, Eis membru Komité Central da Frente Revolucionário Timor Leste Independente (CCF) Jose Agustino Sequeira Somotxo rekunhese Luis Lobato ema ida ne’e luta ba lideransa foun iha FRETILIN nia laran, nia maka rasik mak inisia luta ba mudansa ida ne’e hahú husi retiru FRETILIN nian Iha tinan 2018 ne’ebe realiza iha Munisipiu Vikeke
“Ninia mate hanesan motivasaun boot ida ba ha’u, atu kontinua nafatin luta ne’ebé nia rasik hahu, la’os ema seluk, hahu iha retiru Viqueque iha 2018, ami sei kontinua ninia obra ne’e ba oin, nia ba ho matebean sira hotu, nia maun sira hanesan familia Lobato, familia hotu-hotu iha Timor Leste ne’ebe ohin loron sai hanesan matebian, erois, martires da patria ne’e sei ba hamutuk ho sira hotu no sei fo hanoin diak, neon diak, matenek diak ba ami kontinua nafatin luta mudansa iha FRETILIN”.Hatete Eis Membru CCF Jose Agustino Sequeira Somotxo ba SAPNewsTL hafoin presta omenagem ba Saudozu Luis Lobato iha Delta Nova Dili, 18/06/2023
Jose Somotxo hatutan, Sira sei kontinua luta ba mudansa interna iha Partidu FRETILIN nia laran maske nia laiha ona
“Ha’u hanesan kamarada ida ne’ebe luta ba mudansa interna partidu ninia lideransa, ami nia luta ne’e ba lideransa foun. Ami nain haat sempre hamrik iha oin, la’os na’in haat ne’e deit ema barak tebes ne’ebe hamrik iha ami nia kotuk. Maibe hanesan liña frente ami nain haat ohin loron públiku tomak militantes hotu-hotu Partidu FRETILIN mos asiste katak ami hotu lakon kuadru ida ne’ebe frontal ba diak Partidu Nian”nia dehan
Atual Deputadu Kinta Lejislatura ne’e konta, “Saudozu Luis ha’u koñese dezde ke ha’u mai husi Portugal iha 2006 nia mos Vise Ministru Saúde, ha’u mos Vise Ministru Interior, ami hola parte iha segundu no triseiru guvernu konstituisional ne’ebe ha’u konese nia tanba hanesan familia Lobato sempre sama atensaun ou atrai ita atu konese lalais, ami konese malu iha ne’eba depois ami hola parte iha Partidu FRETILIN”. nia fo sasin
Nia konsidera Saudozu Luis Lobato lider ne’ebe Persistente, Resistente no firme maske hetan ameasa oioin durante ne’e
“Nia ema ida ne’ebe firme, maduru no frontal maibe ninia persistensia ho rezistensia ba objetivu ruma, ami nain hira ne’e hanesan deit, ami nunka deziste mezmu ke ameasa ka situasoins oi-oin, ami sei kontinua persistensia ho rezistensia ne mak hanesan ami hotu aprende ba malu”. Nia hakotu
Jornalista : Marcela Mery da Costa